ਨੀਟ ਪੇਪਰ ਲੀਕ ਮਾਮਲੇ ਵਿੱਚ ਸੀਬੀਆਈ ਦੀ ਜਾਂਚ ਵਿੱਚ ਇੱਕ ਵੱਡੇ ਨੈੱਟਵਰਕ ਦੇ ਮਿਲੇ ਸੰਕੇਤ

ਨੀਟ-ਯੂਜੀ 2026 ਪੇਪਰ ਲੀਕ ਮਾਮਲੇ ਵਿੱਚ ਸੀਬੀਆਈ ਦੀ ਜਾਂਚ ਵਿੱਚ ਇੱਕ ਵੱਡੇ ਨੈੱਟਵਰਕ ਦੇ ਸੰਕੇਤ ਮਿਲੇ ਹਨ। ਜਾਂਚ ਏਜੰਸੀ ਨੂੰ ਸ਼ੱਕ ਹੈ ਕਿ ਇਸ ਨੈੱਟਵਰਕ ਵਿੱਚ ਪ੍ਰੀਖਿਆ ਨਾਲ ਜੁੜੇ ਅੰਦਰੂਨੀ ਲੋਕ, ਵਿਚੋਲੇ ਅਤੇ ਵੱਖ-ਵੱਖ ਰਾਜਾਂ ਦੇ ਵਿਦਿਆਰਥੀ ਸ਼ਾਮਲ ਸਨ।
ਅਦਾਲਤ ਵਿੱਚ ਪੇਸ਼ ਕੀਤੇ ਗਏ ਦਸਤਾਵੇਜ਼ਾਂ ਅਨੁਸਾਰ, ਪੇਪਰ ਲੀਕ ਕਈ ਪੜਾਵਾਂ ਵਿੱਚ ਹੋਇਆ। ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਸਵਾਲ ਅਤੇ ਜਵਾਬ ਪ੍ਰੀਖਿਆ ਪ੍ਰਣਾਲੀ ਦੇ ਅੰਦਰੋਂ ਬਾਹਰ ਕੱਢੇ ਗਏ ਅਤੇ ਫਿਰ ਵੱਖ-ਵੱਖ ਲੋਕਾਂ ਤੱਕ ਪਹੁੰਚਾਏ ਗਏ। ਸੀਬੀਆਈ ਮੁਤਾਬਕ, ਪੁਣੇ ਦੀ ਬਾਟਨੀ ਪ੍ਰੋਫੈਸਰ ਮਨੀਸ਼ਾ ਮੰਡਹਰੇ ਪ੍ਰੀਖਿਆ ਪ੍ਰਕਿਰਿਆ ਵਿੱਚ ਵਿਸ਼ਾ ਮਾਹਿਰ ਵਜੋਂ ਜੁੜੀ ਹੋਈ ਸੀ। ਏਜੰਸੀ ਨੂੰ ਸ਼ੱਕ ਹੈ ਕਿ ਉਸਦੀ ਬਾਟਨੀ ਅਤੇ ਜ਼ੂਲੋਜੀ ਦੇ ਗੁਪਤ ਪ੍ਰਸ਼ਨਾਂ ਤੱਕ ਪਹੁੰਚ ਸੀ।
ਜਾਂਚ ਵਿੱਚ ਸੇਵਾਮੁਕਤ ਕੈਮਿਸਟਰੀ ਪ੍ਰੋਫੈਸਰ ਪੀ.ਵੀ. ਕੁਲਕਰਨੀ ਦਾ ਨਾਮ ਵੀ ਸਾਹਮਣੇ ਆਇਆ ਹੈ। ਸੀਬੀਆਈ ਨੂੰ ਸ਼ੱਕ ਹੈ ਕਿ ਪ੍ਰੀਖਿਆ ਤੋਂ ਪਹਿਲਾਂ ਹੀ ਪ੍ਰਸ਼ਨ ਪੱਤਰ ਅਤੇ ਉੱਤਰ ਕੁੰਜੀ ਦਾ ਕੁਝ ਹਿੱਸਾ ਪ੍ਰੀਖਿਆ ਪ੍ਰਣਾਲੀ ਦੇ ਅੰਦਰੋਂ ਬਾਹਰ ਕੱਢਿਆ ਗਿਆ ਸੀ। ਸੀਬੀਆਈ ਅਨੁਸਾਰ, ਮਨੀਸ਼ਾ ਮੰਡਹਰੇ ਅਤੇ ਪੁਣੇ ਦੀ ਹੀ ਮਨੀਸ਼ਾ ਵਾਘਮਾਰੇ ਵਿਚਕਾਰ ਨੇੜਲਾ ਸੰਪਰਕ ਸੀ।
ਦੋਵੇਂ ਇੱਕ ਹੀ ਹਾਊਸਿੰਗ ਸੁਸਾਇਟੀ ਵਿੱਚ ਰਹਿੰਦੀਆਂ ਸਨ। ਜਾਂਚ ਵਿੱਚ ਪਤਾ ਲੱਗਿਆ ਕਿ ਵਾਘਮਾਰੇ ਅਕਸਰ ਮੰਡਹਰੇ ਦੇ ਘਰ ਜਾਂਦੀ ਸੀ। ਅਦਾਲਤ ਵਿੱਚ ਸੀਬੀਆਈ ਨੇ ਕਿਹਾ ਕਿ ਮਨੀਸ਼ਾ ਮੰਡਹਰੇ, ਪੀ.ਵੀ. ਕੁਲਕਰਨੀ ਅਤੇ ਮਨੀਸ਼ਾ ਵਾਘਮਾਰੇ ਆਪਸ ਵਿੱਚ ਸਾਜ਼ਿਸ਼ ਤਹਿਤ ਕੰਮ ਕਰ ਰਹੇ ਸਨ। ਏਜੰਸੀ ਮੁਤਾਬਕ, ਲੀਕ ਕੀਤੇ ਪ੍ਰਸ਼ਨ ਪੱਤਰ ਸ਼ੁਭਮ ਖੈਰਨਾਰ ਤੱਕ ਪਹੁੰਚਾਏ ਗਏ ਸਨ।
ਸੀਬੀਆਈ ਨੇ ਅਦਾਲਤ ਨੂੰ ਦੱਸਿਆ ਕਿ ਅਪ੍ਰੈਲ ਵਿੱਚ ਮਨੀਸ਼ਾ ਮੰਡਹਰੇ ਨੇ ਪੁਣੇ ਸਥਿਤ ਆਪਣੇ ਘਰ ਵਿੱਚ ਕੁਝ ਚੋਣਵੇਂ ਵਿਦਿਆਰਥੀਆਂ ਲਈ ’ਸਪੈਸ਼ਲ’ ਕਲਾਸਾਂ ਲਈਆਂ ਸਨ। ਇਨ੍ਹਾਂ ਕਲਾਸਾਂ ਵਿੱਚ ਬਾਟਨੀ ਅਤੇ ਜ਼ੂਲੋਜੀ ਦੇ ਸਵਾਲ ਵਿਦਿਆਰਥੀਆਂ ਨੂੰ ਦੱਸੇ ਗਏ। ਦੱਸਿਆ ਗਿਆ ਹੈ ਕਿ ਮਨੀਸ਼ਾ ਵਾਘਮਾਰੇ ਵਿਦਿਆਰਥੀਆਂ ਨੂੰ ਇਨ੍ਹਾਂ ਕਲਾਸਾਂ ਤੱਕ ਲੈ ਕੇ ਆਉਂਦੀ ਸੀ।
ਜਾਂਚ ਅਨੁਸਾਰ, ਮੰਡਹਰੇ ਵਿਦਿਆਰਥੀਆਂ ਨੂੰ ਸਿੱਧੇ ਪ੍ਰਿੰਟਿਡ ਪੇਪਰ ਦੇਣ ਦੀ ਬਜਾਏ ਸਵਾਲ ਬੋਲ ਕੇ ਲਿਖਵਾਉਂਦੀ ਸੀ ਅਤੇ ਨੋਟਬੁੱਕ ਵਿੱਚ ਉਨ੍ਹਾਂ ਨੂੰ ਸਮਝਾਉਂਦੀ ਸੀ। ਜਾਂਚ ਵਿੱਚ ਆਯੁਰਵੇਦ ਡਾਕਟਰ ਧਨੰਜੇ ਲੋਖੰਡੇ ਦਾ ਨਾਮ ਵੀ ਸਾਹਮਣੇ ਆਇਆ ਹੈ। ਸੀਬੀਆਈ ਦਾ ਕਹਿਣਾ ਹੈ ਕਿ ਉਸਨੂੰ ਵਾਘਮਾਰੇ ਤੋਂ ਪ੍ਰੀਖਿਆ ਨਾਲ ਜੁੜੀ ਸਮੱਗਰੀ ਮਿਲੀ ਸੀ ਅਤੇ ਉਹ ਨੈੱਟਵਰਕ ਵਿੱਚ ਵਿਚੋਲੇ ਦੀ ਭੂਮਿਕਾ ਨਿਭਾ ਰਿਹਾ ਸੀ।
ਸੀਬੀਆਈ ਨੂੰ ਸ਼ੱਕ ਹੈ ਕਿ ਸ਼ੁਭਮ ਖੈਰਨਾਰ ਨੇ ਇਹ ’ਗੈੱਸ ਪੇਪਰ’ ਮੁਲਜ਼ਮ ਯਸ਼ ਯਾਦਵ ਤੱਕ ਪਹੁੰਚਾਇਆ। ਜਾਂਚ ਮੁਤਾਬਕ, ਯਸ਼ ਯਾਦਵ ਨੇ 29 ਅਪ੍ਰੈਲ ਨੂੰ ਪ੍ਰੀਖਿਆ ਤੋਂ ਚਾਰ ਦਿਨ ਪਹਿਲਾਂ ਫਿਜ਼ਿਕਸ, ਕੈਮਿਸਟਰੀ ਅਤੇ ਬਾਇਓਲੋਜੀ ਦੇ ਪ੍ਰਸ਼ਨ ਪੱਤਰ ਪੀਡੀਐਫ ਫਾਰਮੈਟ ਵਿੱਚ ਟੈਲੀਗ੍ਰਾਮ ’ਤੇ ਸ਼ੇਅਰ ਕੀਤੇ ਸਨ।
ਜਾਂਚ ਵਿੱਚ ਇਹ ਵੀ ਸਾਹਮਣੇ ਆਇਆ ਹੈ ਕਿ ਮਾਂਗੀਲਾਲ ਬੀਵਾਲ ਨੇ ਆਪਣੇ ਪੁੱਤਰ ਲਈ ਲੀਕ ਪੇਪਰ ਲੈਣ ਦੇ ਬਦਲੇ 10 ਤੋਂ 12 ਲੱਖ ਰੁਪਏ ਦੇਣ ਦੀ ਗੱਲ ਕਹੀ ਸੀ। ਸੂਤਰਾਂ ਅਨੁਸਾਰ, ਯਸ਼ ਯਾਦਵ ਰਾਜਸਥਾਨ ਦੇ ਸੀਕਰ ਵਿੱਚ ਕੋਚਿੰਗ ਦੌਰਾਨ ਮਾਂਗੀਲਾਲ ਦੇ ਵੱਡੇ ਪੁੱਤਰ ਵਿਕਾਸ ਬੀਵਾਲ ਨੂੰ ਜਾਣਦਾ ਸੀ। ਸੀਬੀਆਈ ਦਾ ਦਾਅਵਾ ਹੈ ਕਿ ਪੇਪਰ ਮਿਲਣ ਤੋਂ ਬਾਅਦ ਮਾਂਗੀਲਾਲ ਨੇ ਉਸਦੀਆਂ ਪ੍ਰਿੰਟ ਕਾਪੀਆਂ ਕਢਵਾਈਆਂ ਅਤੇ ਆਪਣੇ ਪੁੱਤਰ ਅਮਨ ਬੀਵਾਲ, ਰਿਸ਼ਤੇਦਾਰਾਂ ਤੇ ਜਾਣਕਾਰਾਂ ਵਿੱਚ ਵੰਡ ਦਿੱਤੀਆਂ।
ਪੇਪਰ ਲੀਕ ਦੇ ਦੋਸ਼ ਸਾਹਮਣੇ ਆਉਣ ਤੋਂ ਬਾਅਦ ਨੀਟ-ਯੂਜੀ 2026 ਪ੍ਰੀਖਿਆ ਰੱਦ ਕਰ ਦਿੱਤੀ ਗਈ ਸੀ। ਇਸ ਤੋਂ ਬਾਅਦ ਮਾਮਲੇ ਦੀ ਜਾਂਚ ਸੀਬੀਆਈ ਨੂੰ ਸੌਂਪੀ ਗਈ। ਸੀਬੀਆਈ ਨੇ 12 ਮਈ ਨੂੰ ਐਨਟੀਏ ਦੇ ਉੱਚ ਸਿੱਖਿਆ ਵਿਭਾਗ ਦੇ ਨਿਰਦੇਸ਼ਕ ਵਰੁਣ ਭਾਰਦਵਾਜ ਦੀ ਸ਼ਿਕਾਇਤ ਦੇ ਅਧਾਰ ’ਤੇ ਮਾਮਲਾ ਦਰਜ ਕੀਤਾ ਸੀ।
ਹੁਣ ਨੀਟ-ਯੂਜੀ 2026 ਦੀ ਦੁਬਾਰਾ ਪ੍ਰੀਖਿਆ 21 ਜੂਨ ਨੂੰ ਹੋਵੇਗੀ। ਸੀਬੀਆਈ ਫਿਲਹਾਲ ਇਲੈਕਟ੍ਰਾਨਿਕ ਡਿਵਾਈਸਾਂ, ਪੈਸਿਆਂ ਦੇ ਲੈਣ-ਦੇਣ ਅਤੇ ਕਾਲ ਰਿਕਾਰਡਾਂ ਦੀ ਫੋਰੈਂਸਿਕ ਜਾਂਚ ਕਰ ਰਹੀ ਹੈ ਤਾਂ ਜੋ ਪੂਰੇ ਨੈੱਟਵਰਕ ਦਾ ਪਤਾ ਲਗਾਇਆ ਜਾ ਸਕੇ।