ਸਿਹਤ ਵਿਭਾਗ ਵਿੱਚ 69 ਖਾਲੀ ਅਸਾਮੀਆਂ ‘ਤੇ ਫਿਜਿਓਥੈਰਾਪਿਸਟਾਂ ਦੀ ਭਰਤੀ ਕੀਤੀ ਜਾਵੇਗੀ : ਆਰਤੀ ਸਿੰਘ ਰਾਓ

ਸਿਹਤ ਵਿਭਾਗ ਵਿੱਚ 69 ਖਾਲੀ ਅਸਾਮੀਆਂ ‘ਤੇ ਫਿਜਿਓਥੈਰਾਪਿਸਟਾਂ ਦੀ ਭਰਤੀ ਕੀਤੀ ਜਾਵੇਗੀ : ਆਰਤੀ ਸਿੰਘ ਰਾਓ
ਹਰਿਆਣਾ ਦੀ ਸਿਹਤ ਮੰਤਰੀ ਆਰਤੀ ਸਿੰਘ ਰਾਵ ਨੇ ਦੱਸਿਆ ਕਿ ਰਾਜ ਦੇ ਸਿਹਤ ਵਿਭਾਗ ਵਿੱਚ ਜਲਦੀ ਹੀ ਫਿਜਿਓਥੈਰਾਪਿਸਟਾਂ ਦੀਆਂ 69 ਖਾਲੀ ਅਸਾਮੀਆਂ ਭਰੀਆਂ ਜਾਣਗੀਆਂ। ਇਸ ਸਬੰਧੀ ਹਰਿਆਣਾ ਲੋਕ ਸੇਵਾ ਆਯੋਗ ਨੂੰ ਮੰਗ ਪੱਤਰ ਭੇਜਿਆ ਗਿਆ ਹੈ। ਪਹਿਲਾਂ ਵਿਭਾਗ ਵੱਲੋਂ 54 ਅਸਾਮੀਆਂ ਲਈ ਮੰਗ ਪੱਤਰ ਭੇਜਿਆ ਗਿਆ ਸੀ, ਜਿਸ ਨੂੰ ਹੁਣ ਸੋਧ ਕਰਕੇ 69 ਅਸਾਮੀਆਂ ਲਈ ਭੇਜ ਦਿੱਤਾ ਗਿਆ ਹੈ।
ਸਿਹਤ ਮੰਤਰੀ ਨੇ ਅੱਗੇ ਦੱਸਿਆ ਕਿ ਜ਼ਿਲ੍ਹਾ ਜੀੰਦ ਦੇ ਪਿੰਡ ਉਝਾਣਾ ਅਤੇ ਜ਼ਿਲ੍ਹਾ ਕਰਨਾਲ ਦੇ ਪਿੰਡ ਸੰਭਲੀ ਵਿੱਚ ਕਮਿਊਨਿਟੀ ਹੈਲਥ ਸੈਂਟਰ (ਸੀਐਚਸੀ) ਖੋਲ੍ਹਣ ਲਈ ਵੀ ਹਰਿਆਣਾ ਸਰਕਾਰ ਵੱਲੋਂ ਮਨਜ਼ੂਰੀ ਦੇ ਦਿੱਤੀ ਗਈ ਹੈ। ਉਝਾਣਾ ਵਿੱਚ ਸੀਐਚਸੀ ਦੇ ਨਿਰਮਾਣ ਲਈ 2195.46 ਲੱਖ ਰੁਪਏ ਅਤੇ ਸੰਭਲੀ ਵਿੱਚ ਸੀਐਚਸੀ ਲਈ 2322.37 ਲੱਖ ਰੁਪਏ ਦੀ ਮਨਜ਼ੂਰੀ ਮੁੱਖ ਮੰਤਰੀ ਵੱਲੋਂ ਦਿੱਤੀ ਗਈ ਹੈ।
ਆਰਤੀ ਸਿੰਘ ਰਾਵ ਨੇ ਕਿਹਾ ਕਿ ਉਨ੍ਹਾਂ ਨੇ ਅਧਿਕਾਰੀਆਂ ਨੂੰ ਨਿਰਦੇਸ਼ ਦਿੱਤੇ ਹਨ ਕਿ ਜਿੱਥੇ ਵੀ ਪਿੰਡਾਂ ਵਿੱਚ ਉਪ-ਸਿਹਤ ਕੇਂਦਰ, ਪੀਐਚਸੀ, ਸੀਐਚਸੀ ਜਾਂ ਹੋਰ ਸਿਹਤ ਸੰਸਥਾਵਾਂ ਦੀ ਲੋੜ ਹੋਵੇ, ਉੱਥੇ ਜਲਦੀ ਤੋਂ ਜਲਦੀ ਨਿਯਮਾਂ ਅਨੁਸਾਰ ਇਹ ਸਹੂਲਤਾਂ ਸ਼ੁਰੂ ਕੀਤੀਆਂ ਜਾਣ ਤਾਂ ਜੋ ਪਿੰਡਾਂ ਦੇ ਲੋਕਾਂ ਨੂੰ ਗੁਣਵੱਤਾ ਵਾਲੀਆਂ ਅਤੇ ਸਸਤੀ ਸਿਹਤ ਸੇਵਾਵਾਂ ਉਪਲਬਧ ਹੋ ਸਕਣ।