ਸੀਰੀਆ ਦੀ ਅਦਾਲਤ ਨੇ ਜੰਗੀ ਅਪਰਾਧਾਂ ਦੇ ਦੋਸ਼ ਤਹਿਤ ਗੱਦੀਓਂ ਲਾਹੇ ਰਾਸ਼ਟਰਪਤੀ ਬਸ਼ਰ ਅਲ-ਅਸਦ ਨੂੰ ਮੌਤ ਦੀ ਸਜ਼ਾ ਸੁਣਾਈ

ਸੀਰੀਆ ਦੀ ਇੱਕ ਅਦਾਲਤ ਨੇ ਦੇਸ਼ ਦੇ ਗੱਦੀਓਂ ਲਾਹੇ ਰਾਸ਼ਟਰਪਤੀ ਬਸ਼ਰ ਅਲ-ਅਸਦ ਅਤੇ ਉਸਦੇ ਭਰਾ ਨੂੰ ਮੌਤ ਦੀ ਸਜ਼ਾ ਸੁਣਾਈ ਹੈ। ਦੋਵਾਂ ਨੂੰ ਜੰਗੀ ਅਪਰਾਧਾਂ ਦਾ ਦੋਸ਼ੀ ਪਾਏ ਜਾਣ ਤੋਂ ਬਾਅਦ ਇਹ ਸਜ਼ਾ *ਗੈਰਹਾਜ਼ਰੀ ਵਿੱਚ* ਸੁਣਾਈ ਗਈ। ਇਹ ਅਪਰਾਧ ਕਥਿਤ ਤੌਰ ’ਤੇ ਸੀਰੀਆ ਵਿੱਚ 14 ਸਾਲ ਲੰਬੇ ਸੰਘਰਸ਼ ਦੌਰਾਨ ਕੀਤੇ ਗਏ ਸਨ, ਜਿਸ ਵਿੱਚ ਲਗਭਗ ਅੱਧਾ ਮਿਲੀਅਨ ਲੋਕਾਂ ਦੀ ਜਾਨ ਗਈ ਸੀ।
ਇਸੇ ਮਾਮਲੇ ਵਿੱਚ, ਆਤਿਫ ਨਜੀਬ – ਅਸਦ ਦੇ ਚਚੇਰੇ ਭਰਾ – ਨੂੰ ਵੀ ਮੌਤ ਦੀ ਸਜ਼ਾ ਸੁਣਾਈ ਗਈ ਸੀ। ਨਜੀਬ ’ਤੇ ਦੱਖਣੀ ਪ੍ਰਾਂਤ ਦਾਰਾ ਵਿੱਚ ਸਰਕਾਰੀ ਕਾਰਵਾਈ ਦੀ ਅਗਵਾਈ ਕਰਨ ਦਾ ਦੋਸ਼ ਲਗਾਇਆ ਗਿਆ ਸੀ, ਇੱਕ ਅਜਿਹੀ ਘਟਨਾ ਜਿਸਨੇ ਸ਼ੁਰੂਆਤੀ ਵਿਦਰੋਹ ਨੂੰ ਭੜਕਾਇਆ ਅਤੇ ਬਾਅਦ ਵਿੱਚ ਘਰੇਲੂ ਯੁੱਧ ਵਿੱਚ ਬਦਲ ਗਿਆ। ਸਖ਼ਤ ਸੁਰੱਖਿਆ ਦੇ ਵਿਚਕਾਰ, ਨਜੀਬ ਇੱਕ ਅਦਾਲਤ ਦੇ ਪਿੰਜਰੇ ਦੇ ਅੰਦਰ ਜੇਲ੍ਹ ਦੀ ਵਰਦੀ ਪਹਿਨ ਕੇ ਖੜ੍ਹਾ ਸੀ ਜਦੋਂ ਜੱਜ ਨੇ ਸਜ਼ਾ ਸੁਣਾਈ।
ਦਸੰਬਰ 2024 ਵਿੱਚ ਬਾਗੀਆਂ ਦੇ ਦਮਿਸ਼ਕ ਵਿੱਚ ਦਾਖਲ ਹੋਣ ਤੋਂ ਬਾਅਦ ਅਸਦ ਅਤੇ ਉਸਦਾ ਭਰਾ ਮਹੇਰ ਰੂਸ ਭੱਜ ਗਏ ਸਨ। ਨਜੀਬ ਨੂੰ ਬਾਅਦ ਵਿੱਚ ਗ੍ਰਿਫਤਾਰ ਕਰ ਲਿਆ ਗਿਆ ਅਤੇ ਉਹ ਮੁਕੱਦਮੇ ਦਾ ਸਾਹਮਣਾ ਕਰਨ ਵਾਲੇ ਸਭ ਤੋਂ ਉੱਚੇ ਦਰਜੇ ਦੇ ਅਧਿਕਾਰੀਆਂ ਵਿੱਚੋਂ ਇੱਕ ਬਣ ਗਿਆ। ਨਜੀਬ ਸੀਰੀਆਈ ਫੌਜ ਵਿੱਚ ਇੱਕ ਸਾਬਕਾ ਬ੍ਰਿਗੇਡੀਅਰ ਜਨਰਲ ਹੈ; 2011 ਵਿੱਚ, ਅਸਦ ਸ਼ਾਸਨ ਦੌਰਾਨ, ਉਸਨੇ ਦੱਖਣੀ ਪ੍ਰਾਂਤ ਦਾਰਾ ਵਿੱਚ ਰਾਜਨੀਤਿਕ ਸੁਰੱਖਿਆ ਸ਼ਾਖਾ ਦੇ ਮੁਖੀ ਵਜੋਂ ਸੇਵਾ ਨਿਭਾਈ।
ਅਸਦ ਪਰਿਵਾਰ ਨੇ 50 ਸਾਲ ਸੀਰੀਆ ਉੱਤੇ ਰਾਜ ਕੀਤਾ। ਹਾਫ਼?ਜ਼ ਅਲ-ਅਸਦ ਅਤੇ ਬਾਅਦ ਵਿੱਚ ਉਸਦੇ ਪੁੱਤਰ, ਬਸ਼ਰ ਅਲ-ਅਸਦ ਨੇ ਲੰਬੇ ਸਮੇਂ ਤੱਕ ਸੀਰੀਆ ਵਿੱਚ ਸੱਤਾ ਸੰਭਾਲੀ। 2011 ਵਿੱਚ ’ਅਰਬ ਸਪਰਿੰਗ’ ਦੌਰਾਨ, ਬਸ਼ਰ ਅਲ-ਅਸਦ ਦੀ ਸਰਕਾਰ ਅਤੇ ਉਸਦੇ ਕਥਿਤ ਤੌਰ ’ਤੇ ਦਮਨਕਾਰੀ ਸ਼ਾਸਨ ਵਿਰੁੱਧ ਇੱਕ ਵਿਦਰੋਹ ਸ਼ੁਰੂ ਹੋਇਆ, ਜੋ 13 ਸਾਲਾਂ ਤੱਕ ਚੱਲੇ ਇੱਕ ਵਿਨਾਸ਼ਕਾਰੀ ਘਰੇਲੂ ਯੁੱਧ ਵਿੱਚ ਬਦਲ ਗਿਆ। ’ਸੀਰੀਅਨ ਆਬਜ਼ਰਵੇਟਰੀ ਫਾਰ ਹਿਊਮਨ ਰਾਈਟਸ’ ਦੇ ਅਨੁਸਾਰ, ਇਸ ਘਰੇਲੂ ਯੁੱਧ ਵਿੱਚ ਅੱਧਾ ਮਿਲੀਅਨ ਤੋਂ ਵੱਧ ਲੋਕ ਮਾਰੇ ਗਏ ਸਨ। ਬਸ਼ਰ ਅਲ-ਅਸਦ ਅਤੇ ਉਸਦੇ ਭਰਾ ਨੂੰ ਹੁਣ ਇਸੇ ਜੰਗੀ ਅਪਰਾਧ ਲਈ ਮੌਤ ਦੀ ਸਜ਼ਾ ਸੁਣਾਈ ਗਈ ਹੈ।