ਭੀਖੀ ਡਿਸਟ੍ਰੀਬਿਊਟਰੀ ’ਚ ਮੁਰੰਮਤ ਉਪਰੰਤ ਮੁੜ ਫਿਰ ਉਸੇ ਜਗ੍ਹਾ ’ਤੇ ਪਿਆ ਪਾੜ

ਭੀਖੀ ਡਿਸਟ੍ਰੀਬਿਊਟਰੀ ਵਿੱਚ 13 ਜੂਨ ਦੀ ਸਵੇਰ ਕਰੀਬ 3 ਵਜੇ ਪਏ ਪਾੜ ਨੂੰ ਪੂਰਨ ਅਤੇ ਨਹਿਰ ਦੀ ਨੁਕਸਾਨਗ੍ਰਸਤ ਲਾਇਨਿੰਗ ਦੀ ਮੁਰੰਮਤ ਲਈ ਬੀਤੀ ਕੱਲ੍ਹ ਸ਼ਾਮ 8 ਵਜੇ ਦੇ ਕਰੀਬ ਤੱਕ ਕੰਮ ਚੱਲਦਾ ਰਿਹਾ ਅਤੇ ਅੱਜ ਬਾਅਦ ਦੁਪਿਹਰ 3 ਵਜੇ ਦੇ ਕਰੀਬ ਨਹਿਰ ਵਿੱਚ ਪਾਣੀ ਦੀ ਸਪਲਾਈ ਬਹਾਲ ਕਰ ਦਿੱਤੀ ਗਈ ਪ੍ਰੰਤੂ ਸੀਮਿੰਟ ਕੰਕਰੀਟ ਨਾਲ ਕੀਤੀ ਲਾਇੰਨਿੰਗ ਅਤੇ ਬੈੱਡ ਦੀ ਮੁਰੰਮਤ ਪਾਣੀ ਦਾ ਦਬਾਅ ਨਹੀ ਝੱਲ ਸਕੀ, ਮੁੜ ਪਹਿਲਾਂ ਵਾਲੀ ਜਗ੍ਹਾ ਤੋਂ ਹੀ ਨਹਿਰ ਟੁੱਟ ਗਈ ਜਿਸ ਨੂੰ ਲੈਕੇ ਕਿਸਾਨਾਂ ਅਤੇ ਸ਼ਹਿਰ ਵਾਸੀਆਂ ਵਿੱਚ ਭਾਰੀ ਰੋਸ ਹੈ ਅਤੇ ਲੋਕ ਸਿੰਚਾਈ ਵਿਭਾਗ ਦੀ ਕਾਰਗੁਜਾਰੀ ਤੋਂ ਦੁਖੀ ਹੀ ਨਹੀਂ ਬਲਕਿ ਸਿੰਚਾਈ ਵਿਭਾਗ ਦੇ ਉਪ ਮੰਡਲ ਅਫਸਰ ਖਿਲਾਫ ਕਾਨੂੰਨੀ ਕਾਰਵਾਈ ਕਰਨ ਦੀ ਮੰਗ ਵੀ ਕਰ ਰਹੇ ਹਨ। ਅੱਜ ਮੁੜ ਨਹਿਰ ਟੁੱਟਣ ਦੀ ਸੂਚਨਾ ਮਿਲਦੇ ਹੀ ਭੀਖੀ ਨਿਵਾਸੀ ਵੱਡੀ ਗਿਣਤੀ ਵਿੱਚ ਨਹਿਰ ‘ਤੇ ਇਕੱਠੇ ਹੋ ਕੇ ਸਰਕਾਰ ਖਿਲਾਫ ਆਪਣਾ ਰੋਸ ਪ੍ਰਗਟਾਉਦੇ ਹੋਏ ਕਿਹਾ ਕਿ ਸਰਕਾਰ ਦੇ ਨਿਕੰਮੇਪਨ ਕਾਰਨ ਆਮ ਲੋਕ ਪ੍ਰੇਸ਼ਾਨ ਹੀ ਨਹੀ ਹੋ ਰਹੇ ਬਲਕਿ ਕਿਸਾਨਾਂ ਦਾ ਵਿੱਤੀ ਨੁਕਸਾਨ ਵੀ ਹੋ ਰਿਹਾ ਹੈ ਅਤੇ ਪਾਣੀ ਕਾਰਨ ਕਈ ਘਰ ਵੀ ਨੁਕਸਾਨੇ ਗਏ ਹਨ। ਦੂਸਰੇ ਪਾਸੇ ਨਗਰ ਪੰਚਾਇਤ ਵਲੋਂ ਬਰਸਾਤੀ ਪਾਣੀ ਦੀ ਨਿਕਾਸੀ ਲਈ ਨਹਿਰ ਹੇਠੋਂ ਪਾਈ ਜਮੀਨਦੋਜ ਪਾਇਪਲਾਇਨ ਤੋਂ ਵੀ ਦੁਖੀ ਹਨ। ਉਨਾਂ ਨਗਰ ਪੰਚਾਇਤ ਨੂੰ ਇਸ ਵਰਤਾਰੇ ਲਈ ਜਿੰਮੇਵਾਰ ਦਸਦਿਆਂ ਕਿਹਾ ਕਿ ਨਗਰ ਪੰਚਾਇਤ ਵਲੋਂ ਪਾਇਪ ਨੂੰ ਪਾਉਣ ਸਮੇਂ ਵਰਤੀ ਅਣਗਹਿਲੀ ਦਾ ਖਮਿਆਜਾ ਕਿਸਾਨਾਂ ਅਤੇ ਆਮ ਲੋਕਾਂ ਨੂੰ ਭੁਗਤਣਾ ਪੈ ਰਿਹਾ ਹੈ। ਇਸ ਸਬੰਧੀ ਜਦੋਂ ਸਿੰਚਾਈ ਵਿਭਾਗ ਦੇ ਕਾਰਜਕਾਰੀ ਇੰਜੀਨੀਅਰ ਗੁਰਸਾਗਰ ਸਿੰਘ ਚਹਿਲ ਨਾਲ ਗੱਲ ਕੀਤੀ ਤਾਂ ਉਨਾਂ ਕਿਹਾ ਕਿ ਲਾਇਨਿੰਗ ਵਿੱਚ ਕੁਝ ਲੀਕੇਜ ਹੋਈ ਹੈ ਜਿਸਦੀ ਮੁਰੰਮਤ ਜਲਦੀ ਕਰ ਦਿੱਤੀ ਜਾਵੇਗੀ। ਅਗਲੇ ਸਵਾਲਾਂ ਤੋਂ ਬਚਣ ਲਈ ਫੋਨ ਕੱਟ ਕਰ ਗਏ। ਦੂਸਰੇ ਪਾਸੇ ਉਪ ਮੰਡਲ ਅਫਸਰ ਸਤਿਗੁਰ ਸਿੰਘ ਨੇ ਫੋਨ ਚੁੱਕਣ ਦੀ ਜਹਿਮਤ ਨਹੀ ਕੀਤੀ। ਜਦੋਂ ਕਿ ਪਾੜ ਦੇ ਨਾਲ ਲੱਗਵੀਂ ਜਮੀਨ ਵਾਲਾ ਕਿਸਾਨ ਮਹਿੰਦਰ ਸਿੰਘ ਢਿਲੋਂ ਭੁੱਬਾਂ ਮਾਰ ਕੇ ਰੋ ਰਿਹਾ ਸੀ ਕਿ ਮੇਰੀ ਜਮੀਨ ਦੇ ਨਾਲ ਨਾਲ ਝੋਨੇ ਦੀ ਪੌਦ ਅਤੇ ਘਰ ਵੀ ਨੁਕਸਾਨਿਆ ਗਿਆ। ਉਸਨੇ ਕਿਹਾ ਕਿ ਅਜਿਹੇ ਅਖੌਤੀ ਵਿਕਾਸ ਤੋਂ ਬਿਨ੍ਹਾਂ ਅਸੀਂ ਚੰਗੇ ਸੀ। ਉਹ ਮਾੜਾ ਵਕਤ ਸੀ ਜਦੋਂ ਉਸਨੇ ਨਗਰ ਪੰਚਾਇਤ ਨੂੰ ਇਥੋਂ ਪਾਇਪ ਪਾਉਣ ਲਈ ਸਹਿਮਤੀ ਦੇ ਦਿੱਤੀ। ਫੋਟੋ: ਭੀਖੀ ਡਿਸਟਰੀਬਿਊਟਰੀ ਵਿੱਚ ਦੁਬਾਰਾ ਪਿਆ ਪਾੜ ਅਤੇ ਪਾੜ ਨੇੜੇ ਕਬਾੜ ਦੀ ਦੁਕਾਨ ਵਾਲੇ ਆਪਣਾ ਸਮਾਨ ਸੰਭਾਲਦੇ ਹੋਏ।