ਬੰਗਾਲ ਪੈਟਰੋਕੈਮੀਕਲ ਪਾਈਪਲਾਈਨ ਵਿੱਚ ਅੱਗ; 17 ਜ਼ਖਮੀ, 2 ਗੰਭੀਰ; ਰੇਲ ਸੇਵਾਵਾਂ ਪ੍ਰਭਾਵਿਤ

ਪੱਛਮੀ ਬੰਗਾਲ ਦੇ ਹਲਦੀਆ ਵਿੱਚ ਸੋਮਵਾਰ ਸਵੇਰੇ 2:45 ਵਜੇ ਇੱਕ ਨੈਫਥਾ ਸਪਲਾਈ ਪਾਈਪਲਾਈਨ ਵਿੱਚ ਧਮਾਕੇ ਤੋਂ ਬਾਅਦ ਅੱਗ ਲੱਗ ਗਈ। ਚਿਰੰਜੀਬਪੁਰ ਖੇਤਰ (ਹਲਦੀਆ ਨਗਰਪਾਲਿਕਾ ਦੇ ਵਾਰਡ 13) ਵਿੱਚ ਕਈ ਘਰ ਅੱਗ ਨਾਲ ਪ੍ਰਭਾਵਿਤ ਹੋਏ। ਇਸ ਘਟਨਾ ਵਿੱਚ 17 ਲੋਕ ਸੜ ਗਏ। ਪੁਲਿਸ ਦੇ ਅਨੁਸਾਰ, ਸਾਰੇ ਪੀੜਤਾਂ ਨੂੰ ਹਲਦੀਆ ਸਬ-ਡਿਵੀਜ਼ਨਲ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ। ਪੰਜ ਨੂੰ ਤਾਮਲੁਕ ਮੈਡੀਕਲ ਕਾਲਜ ਅਤੇ ਹਸਪਤਾਲ ਰੈਫਰ ਕੀਤਾ ਗਿਆ; ਜਿਨ੍ਹਾਂ ਵਿੱਚੋਂ ਦੋ ਦੀ ਹਾਲਤ ਗੰਭੀਰ ਹੈ। ਅੱਗ ਬੁਝਾਉਣ ਲਈ 12 ਤੋਂ ਵੱਧ ਫਾਇਰ ਟੈਂਡਰ ਤਾਇਨਾਤ ਕੀਤੇ ਗਏ ਹਨ।
ਅਧਿਕਾਰੀਆਂ ਨੇ ਦੱਸਿਆ ਕਿ ਅੱਗ ਪਹਿਲਾਂ ਹਲਦੀਆ ਪੈਟਰੋਕੈਮੀਕਲ ਨੈਫਥਾ ਪਾਈਪਲਾਈਨ ਵਿੱਚ ਦੇਖੀ ਗਈ ਸੀ। ਥੋੜ੍ਹੀ ਦੇਰ ਬਾਅਦ, ਇਹ ਨੇੜਲੇ ਰਿਹਾਇਸ਼ੀ ਖੇਤਰ ਵਿੱਚ ਫੈਲ ਗਈ। ਦੱਖਣ ਪੂਰਬੀ ਰੇਲਵੇ ਦੇ ਅਨੁਸਾਰ, ਹਲਦੀਆ-ਦੁਰਗਾਚਕ ਰੇਲਵੇ ਲਾਈਨ ਅੱਗ ਵਾਲੀ ਥਾਂ ਦੇ ਨੇੜੇ ਚੱਲਦੀ ਹੈ; ਰੇਲ ਸੇਵਾਵਾਂ ਨੂੰ ਫਿਲਹਾਲ ਮੁਅੱਤਲ ਕਰ ਦਿੱਤਾ ਗਿਆ ਹੈ।
ਪੁਲਿਸ ਨੇ ਦੱਸਿਆ ਕਿ ਪਾਈਪਲਾਈਨ ਵਿੱਚ ਅੱਗ ਲੱਗਣ ਦੇ ਕਾਰਨਾਂ ਦਾ ਅਜੇ ਤੱਕ ਪਤਾ ਨਹੀਂ ਲੱਗ ਸਕਿਆ ਹੈ। ਪੂਰੇ ਇਲਾਕੇ ਨੂੰ ਘੇਰ ਲਿਆ ਗਿਆ ਹੈ। ਅੱਗ ਕਾਰਨ ਘਟਨਾ ਸਥਾਨ ਦੇ ਨੇੜੇ ਰੇਲਵੇ ਓਵਰਹੈੱਡ ਇਲੈਕਟ?ਰੀਕਲ ਉਪਕਰਣਾਂ ਨੂੰ ਵੀ ਨੁਕਸਾਨ ਪਹੁੰਚਿਆ ਹੈ।
ਹਲਦੀਆ ਪੈਟਰੋਕੈਮੀਕਲਜ਼ ਨੇ ਘਟਨਾ ਸੰਬੰਧੀ ਇੱਕ ਬਿਆਨ ਜਾਰੀ ਕੀਤਾ, ਜਿਸ ਵਿੱਚ ਕਿਹਾ ਗਿਆ ਹੈ ਕਿ ਜ਼ਖਮੀਆਂ ਦੀਆਂ ਰਿਪੋਰਟਾਂ ਹਨ ਅਤੇ ਕੰਪਨੀ ਪ੍ਰਭਾਵਿਤ ਵਿਅਕਤੀਆਂ ਅਤੇ ਪ੍ਰਸ਼ਾਸਨ ਨੂੰ ਹਰ ਸੰਭਵ ਸਹਾਇਤਾ ਪ੍ਰਦਾਨ ਕਰ ਰਹੀ ਹੈ।
ਕੰਪਨੀ ਦੇ ਅਨੁਸਾਰ, ਮੁੱਢਲੀ ਜਾਣਕਾਰੀ ਤੋਂ ਪਤਾ ਚੱਲਦਾ ਹੈ ਕਿ ਇਹ ਘਟਨਾ ਉਸ ਸਥਾਨ ਦੇ ਨੇੜੇ ਵਾਪਰੀ ਹੋ ਸਕਦੀ ਹੈ ਜਿੱਥੇ ਨੈਫਥਾ ਚੋਰੀ ਹੋ ਰਹੀ ਸੀ। ਹਾਲਾਂਕਿ, ਅੱਗ ਲੱਗਣ ਦੇ ਸਹੀ ਕਾਰਨਾਂ ਦੀ ਜਾਂਚ ਸਬੰਧਤ ਏਜੰਸੀਆਂ ਨਾਲ ਤਾਲਮੇਲ ਕਰਕੇ ਕੀਤੀ ਜਾ ਰਹੀ ਹੈ।
ਦੱਖਣ ਪੂਰਬੀ ਰੇਲਵੇ ਨੇ ਦੱਸਿਆ ਕਿ ’ਸ਼ਿਲਪਾ ਪ੍ਰਵੇਸ਼ ਗੇਟ’ ਨੇੜੇ ਗੈਸ ਪਾਈਪ ਫਟਣ ਕਾਰਨ ਮੰਗਲਵਾਰ ਸਵੇਰੇ 5:20 ਵਜੇ ਤੋਂ ਹਲਦੀਆ ਅਤੇ ਦੁਰਗਾਚਕ ਵਿਚਕਾਰ ਰੇਲ ਸੇਵਾਵਾਂ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ।