ਰਾਜਧਾਨੀ ਐਕਸਪ੍ਰੈਸ ਦੇ ਏਸੀ ਕੋਚ ’ਚ ਅਚਾਨਕ ਭੜਕੀ ਅੱਗ, ਕੋਈ ਜਾਨੀ ਨੁਕਸਾਨ ਨਹੀਂ

ਐਤਵਾਰ ਸਵੇਰੇ ਮੱਧ ਪ੍ਰਦੇਸ਼ ਦੇ ਰਤਲਾਮ ਨੇੜੇ ਰਾਜਧਾਨੀ ਐਕਸਪ੍ਰੈਸ ਦੇ ਏਸੀ ਕੋਚ ’ਚ ਅਚਾਨਕ ਅੱਗ ਲੱਗ ਗਈ। ਹਾਦਸੇ ’ਚ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ। ਹਾਲਾਂਕਿ, ਰੇਲਵੇ ਸੁਰੱਖਿਆ ਬਲ ਅਤੇ ਰੇਲਵੇ ਸਟਾਫ ਦੁਆਰਾ ਕੀਤੀ ਗਈ ਸਮਝਦਾਰੀ ਅਤੇ ਤੇਜ਼ ਕਾਰਵਾਈ ਕਾਰਨ ਇੱਕ ਵੱਡਾ ਹਾਦਸਾ ਟਲ ਗਿਆ। ਲਗਭਗ 15 ਮਿੰਟਾਂ ਦੇ ਅੰਦਰ, ਕੋਚ 2-1 ਵਿੱਚ ਮੌਜੂਦ ਸਾਰੇ 68 ਯਾਤਰੀਆਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ। ਇਹ ਘਟਨਾ ਸਵੇਰੇ 5:30 ਵਜੇ ਦੇ ਕਰੀਬ ਪੱਛਮੀ ਮੱਧ ਰੇਲਵੇ ਦੇ ਕੋਟਾ ਡਿਵੀਜ਼ਨ ਦੇ ਅਧੀਨ ਆਉਣ ਵਾਲੇ ਲੂਨੀ ਰਿਚਾ ਅਤੇ ਵਿਕਰਮਗੜ੍ਹ ਅਲੋਟ ਸਟੇਸ਼ਨਾਂ ਵਿਚਕਾਰ ਵਾਪਰੀ। ਰਿਪੋਰਟਾਂ ਤੋਂ ਪਤਾ ਚੱਲਦਾ ਹੈ ਕਿ ਅੱਗ ਦਿੱਲੀ ਜਾਣ ਵਾਲੀ ਰਾਜਧਾਨੀ ਐਕਸਪ੍ਰੈਸ ਦੇ 2-1 ਥਰਡ ਏਸੀ ਕੋਚ ਵਿੱਚ ਲੱਗੀ।
ਰੇਲਵੇ ਦੇ ਸੀਨੀਅਰ ਕਮਰਸ਼ੀਅਲ ਮੈਨੇਜਰ ਸੌਰਭ ਜੈਨ ਨੇ ਦੱਸਿਆ ਕਿ ਅੱਗ ਟ੍ਰੇਨ ਦੇ ਬੀ-1 (2-1) ਕੋਚ ਵਿੱਚ ਲੱਗੀ, ਜਿਸ ਵਿੱਚ ਉਸ ਵੇਲੇ 68 ਯਾਤਰੀ ਸਵਾਰ ਸਨ। ਅੱਗ ਲੱਗਦਿਆਂ ਹੀ ਰੇਲਵੇ ਅਮਲੇ ਵੱਲੋਂ ਤੁਰੰਤ ਹੰਗਾਮੀ ਕਦਮ ਚੁੱਕੇ ਗਏ। ਸੁਰੱਖਿਆ ਦੇ ਮੱਦੇਨਜ਼ਰ ਓਵਰਹੈੱਡ ਇਲੈਕਟ੍ਰਿਕ ਸਪਲਾਈ ਯਾਨੀ ਹਵਾਈ ਬਿਜਲੀ ਦੀਆਂ ਤਾਰਾਂ ਦੀ ਸਪਲਾਈ ਨੂੰ ਤੁਰੰਤ ਬੰਦ ਕਰ ਦਿੱਤਾ ਗਿਆ ਅਤੇ ਪ੍ਰਭਾਵਿਤ ਕੋਚ ਨੂੰ ਬਾਕੀ ਟ੍ਰੇਨ ਨਾਲੋਂ ਵੱਖ ਕੀਤਾ ਗਿਆ।
ਸਾਰੇ ਯਾਤਰੀ ਸੁਰੱਖਿਅਤ, ਕੋਟਾ ਸਟੇਸ਼ਨ ’ਤੇ ਜੋੜਿਆ ਜਾਵੇਗਾ ਨਵਾਂ ਡੱਬਾ
ਕੋਟਾ ਰੇਲਵੇ ਦੇ ਪੀਆਰਓ ਰਵਿੰਦਰ ਲਾਖੜਾ ਨੇ ਦੱਸਿਆ ਕਿ ਹਾਦਸੇ ਤੋਂ ਤੁਰੰਤ ਬਾਅਦ ਮੁਸਾਫ਼ਰਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ ਸੀ ਅਤੇ ਕਿਸੇ ਵੀ ਯਾਤਰੀ ਨੂੰ ਕੋਈ ਸੱਟ ਨਹੀਂ ਲੱਗੀ। ਰੇਲਵੇ ਪ੍ਰਸ਼ਾਸਨ ਮੁਤਾਬਕ ਸਾਰੇ ਪ੍ਰਭਾਵਿਤ ਯਾਤਰੀਆਂ ਨੂੰ ਕੋਟਾ ਤੱਕ ਦੇ ਸਫ਼ਰ ਲਈ ਟ?ਰੇਨ ਦੇ ਦੂਜੇ ਡੱਬਿਆਂ ਵਿੱਚ ਬਿਠਾਉਣ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਟ?ਰੇਨ ਦੀ ਸਮਰੱਥਾ ਨੂੰ ਪੂਰਾ ਕਰਨ ਲਈ ਕੋਟਾ ਸਟੇਸ਼ਨ ’ਤੇ ਇੱਕ ਵਾਧੂ ਕੋਚ (ਡੱਬਾ) ਜੋੜਿਆ ਜਾਵੇਗਾ। ਰੇਲਵੇ ਵੱਲੋਂ ਅੱਗ ਲੱਗਣ ਦੇ ਮੁੱਖ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।