ਸੀਆਈਐਸਸੀਈ ਵਲੋਂ ਸਾਲ 2026 ਲਈ 10ਵੀਂ ਅਤੇ 12ਵੀਂ ਜਮਾਤਾਂ ਦੇ ਨਤੀਜਿਆਂ ਦਾ ਐਲਾਨ, ਕੁੜੀਆਂ ਨੇ ਮੁੜ ਬਾਜੀ ਮਾਰੀ

ਕੌਂਸਲ ਫਾਰ ਦਿ ਇੰਡੀਅਨ ਸਕੂਲ ਸਰਟੀਫਿਕੇਟ ਐਗਜ਼ਾਮੀਨੇਸ਼ਨਜ਼’ ਨੇ ਸਾਲ 2026 ਲਈ 10ਵੀਂ ਅਤੇ 12ਵੀਂ ਜਮਾਤਾਂ ਦੇ ਨਤੀਜਿਆਂ ਦਾ ਐਲਾਨ ਕਰ ਦਿੱਤਾ ਗਿਆ ਹੈ। ਇਕ ਵਾਰ ਫਿਰ ਨਤੀਜਿਆਂ ਵਿਚ ਕੁੜੀਆਂ ਨੇ ਬਾਜ਼ੀ ਮਾਰੀ ਹੈ। ਇਸ ਸਾਲ ਬੋਰਡ ਪ੍ਰੀਖਿਆਵਾਂ ਵਿਚ ਵਿਦਿਆਰਥੀਆਂ ਦਾ ਪ੍ਰਦਰਸ਼ਨ ਸ਼ਾਨਦਾਰ ਰਿਹਾ ਹੈ। 10ਵੀਂ ਜਮਾਤ (ਆਈਸੀਐਸਸੀ) ਦਾ ਕੁੱਲ ਪਾਸ ਪ੍ਰਤੀਸ਼ਤ 99.18% ਰਿਹਾ ਹੈ, ਜਦਕਿ 12ਵੀਂ ਜਮਾਤ (ਆਈਸੀਐਸ) ਵਿਚ 98.13% ਵਿਦਿਆਰਥੀ ਪਾਸ ਹੋਏ ਹਨ।ਪਿਛਲੇ ਸਾਲਾਂ ਦੇ ਰੁਝਾਨ ਨੂੰ ਬਰਕਰਾਰ ਰੱਖਦਿਆਂ, ਇਸ ਵਾਰ ਵੀ ਕੁੜੀਆਂ ਨੇ ਮੁੰਡਿਆਂ ਨਾਲੋਂ ਬਿਹਤਰ ਪ੍ਰਦਰਸ਼ਨ ਕੀਤਾ ਹੈ। 12ਵੀਂ (ਆਈਸੀਐਸ) ਵਿਚ ਕੁੜੀਆਂ ਦਾ ਪਾਸ ਪ੍ਰਤੀਸ਼ਤ 99.45% ਰਿਹਾ, ਜਦਕਿ ਮੁੰਡਿਆਂ ਦਾ ਪਾਸ ਪ੍ਰਤੀਸ਼ਤ 98.64% ਦਰਜ ਕੀਤਾ ਗਿਆ। 10ਵੀਂ (ਆਈਸੀਐਸਸੀ) ਵਿਚ ਕੁੜੀਆਂ 99.37% ਪਾਸ ਪ੍ਰਤੀਸ਼ਤ ਨਾਲ ਮੁੰਡਿਆਂ (98.84%) ਤੋਂ ਅੱਗੇ ਰਹੀਆਂ।
12ਵੀਂ (ਨਾਨ-ਮੈਡੀਕਲ) ਵਿਚ, ਲੁਧਿਆਣਾ ਦੇ ਰੋਯਾਂਸ਼ ਗੁਪਤਾ ਨੇ 99.25%, ਦੀਵਾਨਰ ਸਿੰਘ ਮਿੱਚਾ ਨੇ 98.5% ਅਤੇ ਆਸ਼ਿਕਾ ਗੋਇਲ ਨੇ 98% ਅੰਕ ਪ੍ਰਾਪਤ ਕੀਤੇ। ਮੈਡੀਕਲ ਸਟੀਮ ਵਿਚ ਟੀਆ ਉਪਾਧਿਆਏ ਨੇ 97%, ਨਿਸ਼ਕਾ ਖੰਨਾ ਨੇ 95% ਅਤੇ ਫਤਿਹਵੀਰ ਸਿੰਘ ਨੇ 92.25% ਅੰਕ ਪ੍ਰਾਪਤ ਕੀਤੇ। ਕਾਮਰਸ ਸਟ੍ਰੀਮ ਵਿਚ ਕਿਆਨ ਬੇਰੀ ਨੇ 99.25%, ਪਰਮਕਬੀਰ ਸਿੰਘ ਨੇ 97% ਅਤੇ ਰਹਿਮਤਪ੍ਰੀਤ ਕੌਰ ਅਤੇ ਸਾਤਵਿਕ ਦੁੱਗਲ ਨੇ 96.75% ਅੰਕ ਪ੍ਰਾਪਤ ਕੀਤੇ। ਹਿਊਮੈਨਿਟੀਜ਼ ਸਟ?ਰੀਮ ਵਿਚ ਸਹਰ ਗੁਪਤਾ ਅਤੇ ਗੁਰਦਿੱਤ ਪ੍ਰਤਾਪ ਸਿੰਘ ਗਿੱਲ ਨੇ 98%, ਤਨੀਸ਼ਾ ਸੂਦ ਨੇ 97.75% ਅਤੇ ਨੀਸਾ ਸੋਨੀ ਨੇ 97% ਅੰਕ ਪ੍ਰਾਪਤ ਕੀਤੇ।
10ਵੀਂ ਜਮਾਤ ਦੇ ਸਾਇੰਸ ਸਟ੍ਰੀਮ ਵਿਚ ਅਰਨਵ ਗਰਗ ਨੇ 99.2%, ਇਸ਼ਿਤਾ ਗੋਇਲ ਅਤੇ ਰਿਦਿਤ ਗੋਇਲ ਨੇ 98% ਅਤੇ ਸਾਬੀਰ ਵਰਮਾ ਨੇ 97.8% ਅੰਕ ਪ੍ਰਾਪਤ ਕੀਤੇ। ਕਾਮਰਸ ਸਟ੍ਰੀਮ ਵਿਚ, ਨਮਿਆ ਕਪੂਰ ਨੇ 99.6% ਅੰਕ ਪ੍ਰਾਪਤ ਕੀਤੇ, ਉਸ ਤੋਂ ਬਾਅਦ ਜਾਨਿਆ ਮਾਗੋ ਨੇ 99.2% ਅਤੇ ਸਾਨਵੀ ਦਾਦੂ ਨੇ 99% ਅੰਕ ਪ੍ਰਾਪਤ ਕੀਤੇ। ਵਿਦਿਆਰਥੀ ਆਪਣਾ ਸਕੋਰਕਾਰਡ ਬੋਰਡ ਦੀ ਅਧਿਕਾਰਤ ਵੈੱਬਸਾਈਟ ’ਤੇ ਜਾ ਕੇ ਦੇਖ ਸਕਦੇ ਹਨ।
ਆਈਐਸਸੀ ਵਿੱਚ ਲੜਕੀਆਂ ਨੇ 99.48 ਫੀਸਦੀ ਪਾਸ ਪ੍ਰਤੀਸ਼ਤਤਾ ਹਾਸਲ ਕੀਤੀ, ਜਦੋਂ ਕਿ ਲੜਕਿਆਂ ਦੀ ਪ੍ਰਤੀਸ਼ਤਤਾ 98.81 ਫੀਸਦੀ ਰਹੀ। ਆਈਸੀਐਸਸੀ ਪ੍ਰੀਖਿਆ ਵਿੱਚ 2,56,590 ਉਮੀਦਵਾਰ ਸਫਲ ਹੋਏ, ਜਦੋਂ ਕਿ 2,131 ਪ੍ਰੀਖਿਆ ਪਾਸ ਨਹੀਂ ਕਰ ਸਕੇ। ਦੂਜੇ ਪਾਸੇ ਆਈਐਸਸੀ ਪ੍ਰੀਖਿਆ ਵਿੱਚ 1,02,414 ਉਮੀਦਵਾਰ ਸਫਲ ਹੋਏ, ਜਦੋਂ ਕਿ 902 ਫੇਲ੍ਹ ਹੋ ਗਏ।
ਸ਼੍ਰੇਣੀਵਾਰ, ਆਈਸੀਐਸਸੀ ਵਿੱਚ ਜਨਰਲ ਸ਼੍ਰੇਣੀ ਦੇ ਵਿਦਿਆਰਥੀਆਂ ਨੇ 99.26 ਫੀਸਦੀ ਪਾਸ ਪ੍ਰਤੀਸ਼ਤਤਾ ਦਰਜ ਕੀਤੀ, ਇਸ ਤੋਂ ਬਾਅਦ ਹੋਰ ਪੱਛੜੀਆਂ ਸ਼੍ਰੇਣੀਆਂ (99.24 ਫੀਸਦੀ), ਅਨੁਸੂਚਿਤ ਕਬੀਲੇ (98.07 ਫੀਸਦੀ) ਅਤੇ ਅਨੁਸੂਚਿਤ ਜਾਤੀਆਂ (98.76 ਫੀਸਦੀ) ਦਾ ਨੰਬਰ ਆਉਂਦਾ ਹੈ। ਆਈਐਸਸੀ ਵਿੱਚ ਜਨਰਲ ਸ਼੍ਰੇਣੀ ਦੇ ਵਿਦਿਆਰਥੀਆਂ ਨੇ 99.17 ਫੀਸਦੀ, ਹੋਰ ਪੱਛੜੀਆਂ ਸ਼੍ਰੇਣੀਆਂ ਨੇ 99.12 ਫੀਸਦੀ, ਅਨੁਸੂਚਿਤ ਜਾਤੀਆਂ ਨੇ 98.77 ਫੀਸਦੀ ਅਤੇ ਅਨੁਸੂਚਿਤ ਕਬੀਲਿਆਂ ਨੇ 98.84 ਫੀਸਦੀ ਪਾਸ ਪ੍ਰਤੀਸ਼ਤਤਾ ਦਰਜ ਕੀਤੀ। ਇਹ ਪ੍ਰੀਖਿਆਵਾਂ ਆਈਸੀਐਸਸੀ ਵਿੱਚ 67 ਵਿਸ਼ਿਆਂ ਅਤੇ ਆਈਐਸਸੀ ਵਿੱਚ 45 ਵਿਸ਼ਿਆਂ ਵਿੱਚ ਕਰਵਾਈਆਂ ਗਈਆਂ ਸਨ।