ਟੀਐਮਸੀ ਨੇ ਕਾਂਗਰਸ ਨਾਲ ਮਿਲ ਕੇ ਬੰਗਾਲ ਦੀਆਂ ਔਰਤਾਂ ਨਾਲ ਧੋਖਾ ਕੀਤਾ – ਪੀਐਮ ਮੋਦੀ

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਲੋਕ ਸਭਾ ਵਿੱਚ ਮਹਿਲਾ ਰਾਖਵੇਂਕਰਨ ਨਾਲ ਜੁੜੇ ਸੰਵਿਧਾਨਕ ਸੋਧ ਬਿੱਲ ਦੇ ਡਿੱਗਣ ਲਈ ਐਤਵਾਰ ਨੂੰ ਟੀ.ਐਮ.ਸੀ. , ਕਾਂਗਰਸ ਅਤੇ ਹੋਰ ਵਿਰੋਧੀ ਪਾਰਟੀਆਂ ਨੂੰ ਜ਼ਿੰਮੇਵਾਰ ਠਹਿਰਾਉਂਦੇ ਹੋਏ ਜ਼ੋਰਦਾਰ ਹਮਲਾ ਬੋਲਿਆ।ਬੰਗਾਲ ਦੇ ਬਾਂਕੁੜਾ ਜ਼ਿਲ੍ਹੇ ਦੇ ਵਿਸ਼ਣੂਪੁਰ ਵਿੱਚ ਚੋਣ ਜਨਸਭਾ ਨੂੰ ਸੰਬੋਧਨ ਕਰਦਿਆਂ ਪੀ.ਐਮ. ਨੇ ਖਾਸ ਤੌਰ ’ਤੇ ਟੀ.ਐਮ.ਸੀ. ਨੂੰ ਨਿਸ਼ਾਨੇ ’ਤੇ ਲੈਂਦਿਆਂ ਕਿਹਾ ਕਿ ਉਸ ਨੇ ਕਾਂਗਰਸ ਨਾਲ ਸਾਜ਼ਿਸ਼ ਰਚ ਕੇ ਬੰਗਾਲ ਦੀਆਂ ਭੈਣਾਂ ਨਾਲ ਇੱਕ ਹੋਰ ਧੋਖਾ ਕੀਤਾ ਹੈ।ਮੋਦੀ ਨੇ ਕਿਹਾ ਕਿ ਭਾਜਪਾ ਦੀ ਪਛਾਣ ਹੀ ਮਹਿਲਾ ਸਸ਼ਕਤੀਕਰਨ ਅਤੇ ਮਹਿਲਾ ਸੁਰੱਖਿਆ ਨਾਲ ਹੈ, ਇਸੇ ਲਈ ਦੇਸ਼ ਦੇ ਹਰ ਰਾਜ ਵਿੱਚ ਭੈਣਾਂ-ਬੇਟੀਆਂ ਭਾਜਪਾ ਨੂੰ ਸਭ ਤੋਂ ਵੱਧ ਆਸ਼ੀਰਵਾਦ ਦਿੰਦੀਆਂ ਹਨ। ਅਸੀਂ ਚਾਹੁੰਦੇ ਹਾਂ ਕਿ ’ਵਿਕਸਿਤ ਭਾਰਤ’ ਬਣਾਉਣ ਵਿੱਚ ਬੇਟੀਆਂ ਦੀ ਭੂਮਿਕਾ ਦਾ ਵਿਸਥਾਰ ਹੋਵੇ ਅਤੇ ਰਾਜਨੀਤੀ ਵਿੱਚ ਵੀ ਵੱਧ ਤੋਂ ਵੱਧ ਬੇਟੀਆਂ ਅੱਗੇ ਆਉਣ, ਪਰ ਤੁਸੀਂ ਦੇਖਿਆ ਹੋਵੇਗਾ ਕਿ ਸੰਸਦ ਵਿੱਚ ਕੀ ਹੋਇਆ।
ਟੀ.ਐਮ.ਸੀ. ਨੇ ਬੰਗਾਲ ਦੀਆਂ ਭੈਣਾਂ ਨਾਲ ਇੱਕ ਹੋਰ ਧੋਖਾ ਕੀਤਾ ਹੈ। ਬੰਗਾਲ ਦੀਆਂ ਔਰਤਾਂ 33 ਫੀਸਦੀ ਰਾਖਵਾਂਕਰਨ ਚਾਹੁੰਦੀਆਂ ਸਨ। ਮੋਦੀ ਨੇ ਇਹ ਯਕੀਨੀ ਬਣਾਇਆ। ਅਸੀਂ ਚਾਹੁੰਦੇ ਸੀ ਕਿ ਇਸ ਨੂੰ 2029 ਤੋਂ ਲਾਗੂ ਕੀਤਾ ਜਾਵੇ, ਪਰ ਟੀ.ਐਮ.ਸੀ. ਨਹੀਂ ਚਾਹੁੰਦੀ ਸੀ ਕਿ ਬੰਗਾਲ ਦੀਆਂ ਬੇਟੀਆਂ ਵੱਡੀ ਗਿਣਤੀ ਵਿੱਚ ਐਮ.ਐਲ.ਏ. ਅਤੇ ਐਮ.ਪੀ. ਬਣਨ, ਕਿਉਂਕਿ ਬੰਗਾਲ ਦੀਆਂ ਬੇਟੀਆਂ ਇਨ੍ਹਾਂ ਦੇ ’ਮਹਾਂ ਜੰਗਲਰਾਜ’ ਨੂੰ ਚੁਣੌਤੀ ਦੇ ਰਹੀਆਂ ਹਨ। ਇਸੇ ਲਈ ਟੀ.ਐਮ.ਸੀ. ਨੇ ਕਾਂਗਰਸ ਨਾਲ ਮਿਲ ਕੇ ਸਾਜ਼ਿਸ਼ ਰਚੀ, ਤਾਂ ਜੋ ਇਹ ਬਿੱਲ ਪਾਸ ਨਾ ਹੋ ਸਕੇ।
ਪੀਐਮ ਮੋਦੀ ਨੇ ਬੰਗਾਲ ਦੀਆਂ ਔਰਤਾਂ ਨੂੰ ਬਦਲਾਅ ਦਾ ਸੱਦਾ ਦਿੰਦਿਆਂ ਕਿਹਾ ਕਿ ਟੀ.ਐਮ.ਸੀ. ਨੇ ਉਨ੍ਹਾਂ ਨਾਲ ਜੋ ਵਿਸ਼ਵਾਸਘਾਤ ਕੀਤਾ ਹੈ, ਉਸ ਲਈ ਇਸ ’ਮਹਾਂ ਜੰਗਲਰਾਜ’ ਵਾਲੀ ਸਰਕਾਰ ਨੂੰ ’ਮਹਾਂ ਸਜ਼ਾ’ ਮਿਲਣੀ ਚਾਹੀਦੀ ਹੈ। ਮੋਦੀ ਨੇ ਅੱਗੇ ਕਿਹਾ ਕਿ ਟੀ.ਐਮ.ਸੀ. ਆਦਿਵਾਸੀ ਭੈਣਾਂ-ਬੇਟੀਆਂ ਨਾਲ ਵੀ ਬਹੁਤ ਨਫ਼ਰਤ ਕਰਦੀ ਹੈ। ਭਾਜਪਾ ਨੇ ਦੇਸ਼ ਨੂੰ ਪਹਿਲੀ ਆਦਿਵਾਸੀ ਮਹਿਲਾ ਰਾਸ਼ਟਰਪਤੀ ਦਿੱਤੀ, ਪਰ ਟੀ.ਐਮ.ਸੀ. ਨੇ ਆਦਿਵਾਸੀ ਧੀ ਦ੍ਰੌਪਦੀ ਮੁਰਮੂ ਦੇ ਸਾਹਮਣੇ ਆਪਣਾ ਵੱਖਰਾ ਉਮੀਦਵਾਰ ਖੜ੍ਹਾ ਕਰ ਦਿੱਤਾ ਸੀ।
ਜਿਵੇਂ ਸਾਬਕਾ ਪ੍ਰਧਾਨ ਮੰਤਰੀ ਜਵਾਹਰ ਲਾਲ ਨਹਿਰੂ ਨੇ ਸੰਵਿਧਾਨ ਨਿਰਮਾਤਾ ਬਾਬਾ ਸਾਹਿਬ ਡਾ. ਭੀਮ ਰਾਓ ਅੰਬੇਡਕਰ ਦੇ ਖਿਲਾਫ ਉਮੀਦਵਾਰ ਉਤਾਰਿਆ ਸੀ। ਪੀਐਮ ਮੋਦੀ ਨੇ ਕਿਹਾ ਕਿ ਟੀ.ਐਮ.ਸੀ. ਨਹੀਂ ਚਾਹੁੰਦੀ ਸੀ ਕਿ ਆਦਿਵਾਸੀ ਧੀ ਦ੍ਰੌਪਦੀ ਮੁਰਮੂ ਰਾਸ਼ਟਰਪਤੀ ਬਣੇ। ਮੋਦੀ ਨੇ ਪਿਛਲੇ ਦਿਨੀਂ ਰਾਸ਼ਟਰਪਤੀ ਮੁਰਮੂ ਦੇ ਉੱਤਰੀ ਬੰਗਾਲ ਦੌਰੇ ਦੌਰਾਨ ਹੋਈ ਪ੍ਰੋਟੋਕੋਲ ਦੀ ਉਲੰਘਣਾ ਨੂੰ ਲੈ ਕੇ ਵੀ ਟੀ.ਐਮ.ਸੀ. ਨੂੰ ਘੇਰਿਆ।
ਉਨ੍ਹਾਂ (ਪੀ.ਐਮ. ਮੋਦੀ) ਨੇ ਕਿਹਾ ਕਿ ਦੁਨੀਆ ਭਾਰਤ ਦੇ ਰਾਸ਼ਟਰਪਤੀ ਦਾ ਸਤਿਕਾਰ ਕਰਦੀ ਹੈ, ਪਰ ਟੀ.ਐਮ.ਸੀ. ਅਪਮਾਨ ਕਰਦੀ ਹੈ, ਜਿਸ ਨੂੰ ਪੂਰੇ ਦੇਸ਼ ਨੇ ਦੇਖਿਆ ਹੈ। ਬੰਗਾਲ ਦੀਆਂ ਭੈਣਾਂ ਆਦਿਵਾਸੀ ਸਮਾਜ ਦੀ ਧੀ ਅਤੇ ਰਾਸ਼ਟਰਪਤੀ ਦੇ ਅਪਮਾਨ ਨੂੰ ਕਦੇ ਨਹੀਂ ਭੁੱਲਣਗੀਆਂ।
ਟੀ.ਐਮ.ਸੀ. ਨੂੰ ਇਸ ਦੀ ਸਜ਼ਾ ਮਿਲ ਕੇ ਰਹੇਗੀ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਇਹ ਉਹੀ ਟੀ.ਐਮ.ਸੀ. ਹੈ, ਜੋ ਘੁਸਪੈਠੀਆਂ ਨੂੰ ਲਾਭ ਦੇਣ ਲਈ ਹਰ ਕਾਨੂੰਨ-ਨਿਯਮ ਤੋੜ ਦਿੰਦੀ ਹੈ। ਇਹ ਉਹੀ ਟੀ.ਐਮ.ਸੀ. ਹੈ, ਜੋ ਧਰਮ ਦੇ ਆਧਾਰ ’ਤੇ ਰਾਖਵਾਂਕਰਨ ਦੇਣ ਵਿੱਚ ਜੁਟੀ ਹੋਈ ਹੈ ਅਤੇ ਸੰਵਿਧਾਨ ਦੀਆਂ ਭਾਵਨਾਵਾਂ ਦਾ ਗਲਾ ਘੁੱਟ ਰਹੀ ਹੈ।
ਮੋਦੀ ਨੇ ਕਿਹਾ ਕਿ ਮੈਂ ਬੰਗਾਲ ਵਿੱਚ ਜਿੱਥੇ ਵੀ ਜਾਂਦਾ ਹਾਂ, ਹਰ ਜਨਸਭਾ ਪਹਿਲਾਂ ਨਾਲੋਂ ਵੱਡੀ ਹੁੰਦੀ ਜਾ ਰਹੀ ਹੈ। ਇਹ ਮਾਹੌਲ ਪਿਆਰ, ਉਤਸ਼ਾਹ ਅਤੇ ਇਸ ਨਿਰਦਈ ਸਰਕਾਰ ਪ੍ਰਤੀ ਗੁੱਸੇ ਦਾ ਪ੍ਰਤੀਕ ਹੈ। ਜੋ ਟੀ.ਐਮ.ਸੀ. ਹੁਣ ਤੱਕ ਬੰਗਾਲ ਦੀ ਜਨਤਾ ਨੂੰ ਡਰਾਉਂਦੀ ਸੀ, ਉਹ ’ਬੰਗਾਲ ਟਾਈਗਰ’ ਦੀ ਦਹਾੜ ਤੋਂ ਖੁਦ ਡਰ ਗਈ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ’ਬੰਗਾਲ ਟਾਈਗਰ’ ਬੰਗਾਲ ਦੀ ਜਨਤਾ ਹੈ। ਬੰਗਾਲ ਦੀ ਜਨਤਾ ਦਹਾੜ ਰਹੀ ਹੈ ਕਿ ਹੁਣ ਟੀ.ਐਮ.ਸੀ. ਦਾ ਅੱਤਿਆਚਾਰ ਨਹੀਂ ਸਹਾਂਗੇ ਅਤੇ ਇਸ ਨਿਰਦਈ ਸਰਕਾਰ ਨੂੰ ਹਟਾ ਕੇ ਰਹਾਂਗੇ।
ਇਸ ਨਿਰਦਈ ਸਰਕਾਰ ਨੇ ਇੱਥੇ ’ਆਯੁਸ਼ਮਾਨ ਯੋਜਨਾ’ ਰੋਕੀ ਹੋਈ ਹੈ। ਬੰਗਾਲ ਵਿੱਚ ਭਾਜਪਾ ਸਰਕਾਰ ਬਣਦੇ ਹੀ ਔਰਤਾਂ ਨੂੰ 5 ਲੱਖ ਰੁਪਏ ਤੱਕ ਦੇ ਮੁਫ਼ਤ ਇਲਾਜ ਦੀ ਸਹੂਲਤ ਦਿੱਤੀ ਜਾਵੇਗੀ। ਭਾਜਪਾ ਸਰਕਾਰ ਬਣਨ ’ਤੇ ਬੰਗਾਲ ਵਿੱਚ ਔਰਤਾਂ ਨੂੰ ਸਾਲਾਨਾ 36,000 ਰੁਪਏ ਮਿਲਣਗੇ।