ਪਿੰਡ ਘੜੂੰਆਂ ਵਿਖੇ ਖੁਦਾਈ ਦੌਰਾਨ ਚਾਂਦੀ ਦੇ ਕੁਝ ਸਿੱਕਿਆ ਦੇ ਪ੍ਰਾਪਤ ਹੋਣ ਦੀ ਸੂਚਨਾ ਉਪਰੰਤ ਪ੍ਰਸਾਸ਼ਨ ਨੇ ਕੀਤੀ ਇਹ ਥਾਂ ਪੁਰਾਤੱਤਵ ਸਰਵੇਖਣ ਵਿਭਾਗ ਦੇ ਹਵਾਲੇ

ਨਜ਼ਦੀਕੀ ਪਿੰਡ ਘੜੂੰਆਂ ਵਿਖੇ ਜਦੋਂ ਵਾਰਡ ਨੰਬਰ 3 ਵਿਚ ਲਾਇਬਰੇਰੀ ਦਾ ਨਿਰਮਾਣ ਕਰਨ ਲਈ ਪੁਰਾਣੀ ਧਰਮਸ਼ਾਲਾ ਦੀ ਖੁਦਾਈ ਸ਼ੁਰੂ ਕੀਤੀ ਗਈ ਸੀ ਤਾਂ ਕੱਲ ਉਥੇ ਖੇਡਦੇ ਕੁਝ ਬੱਚਿਆਂ ਨੂੰ ਚਾਂਦੀ ਦੇ ਸਿੱਕੇ ਮਿਲਣ ਉਪਰੰਤ ਅੱਜ ਪ੍ਰਸਾਸ਼ਨ ਤੁਰੰਤ ਹਰਕਤ ਵਿਚ ਆਇਆ ਅਤੇ ਇਸ ਥਾਂ ਨੂੰ ਪੁਰਾਤੱਤਵ ਸਰਵੇਖਣ ਵਿਭਾਗ ਦੇ ਸਪੁਰਦ ਕਰ ਦਿੱਤਾ ਗਿਆ ਹੈ।
ਇਸ ਸਬੰਧੀ ਪ੍ਰਾਪਤ ਜਾਣਕਾਰੀ ਅਨੁਸਾਰ ਕੌਂਸਲ ਵਲੋਂ ਇਥੇ ਖੁਦਾਈ ਕੀਤੀ ਗਈ ਸੀ ਅਤੇ ਇਸ ਉਪਰੰਤ ਮੀਂਹ ਪੈ ਗਿਆ ਅਤੇ ਕੰਮ ਬੰਦ ਹੋ ਗਿਆ। ਕੱਲ ਕੁਝ ਬੱਚੇ ਜਦੋਂ ਇਥੇ ਖੇਡ ਰਹੇ ਸੀ ਤਾਂ ਉਨਾਂ ਨੂੰ ਚਾਂਦੀ ਦੇ ਕੁਝ ਸਿੱਕੇ ਮਿਲੇ ਜੋ ਬਹੁਤ ਪੁਰਾਣੇ ਮੁਗਲਾਂ ਦੇ ਸਮੇਂ ਦੇ ਦੱਸੇ ਜਾਂਦੇ ਹਨ। ਇਸ ਉਪਰੰਤ ਉਥੇ ਸੋਰ ਮਚ ਗਿਆ ਅਤੇ ਦੇਰ ਰਾਤ ਤੱਕ ਲੋਕੀਂ ਛੁਪੇ ਹੋਏ ਖਜਾਨੇ ਦੀ ਭਾਲ ਵਿਚ ਉਥੇ ਮਿੱਟੀ ਦੀ ਖੁਦਾਈ ਕਰਦੇ ਰਹੇ।
ਇਸੇ ਦੌਰਾਨ ਨਗਰ ਪੰਚਾਇਤ ਘੜੂੰਆਂ ਦੇ ਅਧਿਕਾਰੀ ਵੀ ਹਰਕਤ ਵਿਚ ਆਏ ਅਤੇ ਉਨਾਂ ਇਸ ਸਬੰਧੀ ਉਚ ਅਧਿਕਾਰੀਆਂ ਨੂੰ ਅਤੇ ਪੁਲੀਸ ਨੂੰ ਲਿਖਿਆ। ਨਗਰ ਪੰਚਾਇਤ ਘੜੂੰਆਂ ਦੇ ਕਾਰਜਸਾਧਕ ਅਫਸਰ ਰਵੀ ਜਿੰਦਲ ਵਲੋਂ ਇਸ ਸਬੰਧੀ ਅਧਿਕਾਰੀਆਂ ਅਤੇ ਸਫਾਈ ਸੇਵਕ ਦੀ ਉਕਤ ਥਾਂ ਤੇ ਡਿਊਟੀ ਲਗਾ ਦਿੱਤੀ ਅਤੇ ਹੁਕਮ ਜਾਰੀ ਕੀਤੇ ਗਏ ਕਿ ਉਹ ਇਸ ਥਾਂ ਤੇ ਹਰ ਸਮੇਂ ਦੇਖ-ਰੇਖ ਕਰਨਗੇ। ਇਸੇ ਦੌਰਾਨ ਪ੍ਰਸਾਸ਼ਨ ਵਲੋਂ ਉਥੇ ਕੈਮਰੇ ਲਗਾ ਦਿੱਤੇ ਗਏ ਅਤੇ ਪਿੰਡ ਵਿਚ ਇਹ ਮੁਨਾਦੀ ਕਰਵਾ ਦਿੱਤੀ ਗਈ ਕਿ ਕੋਈ ਉਥੇ ਨਹੀਂ ਜਾਵੇਗਾ।
ਜਦੋਂ ਕਾਰਜਸਾਧਕ ਅਧਿਕਾਰੀ ਰਵੀ ਜਿੰਦਲ ਨੂੰ ਪੁੱਛਿਆ ਗਿਆ ਤਾਂ ਉਨਾਂ ਕਿਹਾ ਕਿ ਪ੍ਰਸਾਸ਼ਨ ਨੂੰ ਅਜੇ ਤੱਕ ਕੋਈ ਚਾਂਦੀ ਦਾ ਸਿੱਕਾ ਨਹੀਂ ਮਿਲਿਆ ਹੈ ਪਰ ਇਹ ਥਾਂ ਪੁਰਾਤੱਤਵ ਸਰਵੇਖਣ ਵਿਭਾਗ ਦੇ ਹਵਾਲੇ ਕਰ ਦਿੱਤੀ ਗਈ ਹੈ।