ਸਫਾਈ ਕਰਮਚਾਰੀਆਂ ਦੀ ਹੜਤਾਲ ਕਾਰਨ ਭਿਆਨਕ ਬੀਮਾਰੀ ਫੈਲਣ ਦਾ ਖਦਸਾ

8 ਜੁਲਾਈ ਤੋਂ ਸਫਾਈ ਕਰਮਚਾਰੀ ਆਪਣੀਆਂ ਮੰਗਾਂ ਨੂੰ ਲੈ ਕੇ ਅਣਮਿੱਥੇ ਸਮੇ ਲਈ ਹੜਤਾਲ ਤੇ ਬੈਠੇ ਹਨ। ਖਰੜ ਵਿਚ ਚਾਰੇ ਪਾਸੇ ਗੰਦਗੀ ਦੇ ਢੇਰ ਲੱਗੇ ਹੋਏ ਹਨ। ਬਾਰਿਸ ਪੈਣ ਨਾਲ ਹਾਲਾਤ ਹੋਰ ਵੀ ਖਰਾਬ ਹੋ ਗਏ ਹਨ। ਇਸ ਗੱਲ ਦਾ ਖਦਸਾ ਹੈ ਕਿ ਇਥੇ ਕੋਈ ਭਿਆਨਕ ਬੀਮਾਰੀ ਹੀ ਨਾ ਫੈਲ ਜਾਵੇ।
ਸ਼ਹਿਰ ਵਿਚ ਹਰ ਪਾਸੇ ਗੰਦਗੀ ਹੀ ਗੰਦਗੀ ਨਜ਼ਰ ਆਉਂਦੀ ਹੈ। ਸਚਨ ਸਕੂਲ, ਦੁਸਹਿਰਾ ਗਰਾਉਂਡ, ਮੋਰਿੰਡਾ ਰੋਡ ਆਦਿ ਦੀ ਹਾਲਤ ਬਹੁਤ ਭੈੜੀ ਹੈ। ਦੁਸਹਿਰਾ ਗਰਾਉਂਡ ਕੋਲ ਐਨੀ ਬਦਬੂ ਫੈਲ ਰਹੀ ਹੈ ਕਿ ਕਿਸੇ ਨੂੰ ਵੀ ਇਥੋਂ ਲੰਘਣਾ ਬਹੁਤ ਮੁਸਕਿਲ ਹੈ। ਇਸ ਮੁੱਦੇ ਨੂੰ ਲੈ ਕੇ ਮੌਜੂਦਾ ਸਰਕਾਰ ਦੀ ਲੋਕਾਂ ਵਲੋਂ ਬਹੁਤ ਨਿਖੇਧੀ ਕੀਤੀ ਜਾ ਰਹੀ ਹੈ। ਲੋਕਾਂ ਵਿਚ ਇਸ ਗੱਲ ਨੂੰ ਲੈ ਕੇ ਗੁੱਸਾ ਹੈ ਕਿ ਸਿਹਤ ਸਬੰਧੀ ਐਡਾ ਵੱਡਾ ਮੁੱਦਾ ਹੋਵੇ ਪਰ ਹਾਕਮ ਪਾਰਟੀ ਦੇ ਆਗੂ ਅਤੇ ਲੀਡਰ ਚੁੱਪੀ ਧਾਰੀ ਬੈਠੇ ਹਨ।
ਇੰਝ ਹੀ ਵਿਰੋਧੀ ਧਿਰ ਦੇ ਆਗੂ ਵੀ ਬੈਠੇ ਨਜ਼ਾਰਾ ਵੇਖ ਰਹੇ ਹਨ। ਹਾਕਮ ਧਿਰ ਦੇ ਉਹ ਆਗੂ ਜੋ ਸਾਰਾ ਦਿਨ ਰਾਜ ਪਾਠ ਦਾ ਆਨੰਦ ਮਾਣ ਰਹੇ ਹਨ, ਪਤਾ ਨਹੀਂ ਕਿਥੇ ਗੁੰਮ ਹੋ ਗਏ ਹਨ। ਸਾਰੇ ਆਗੂਆਂ ਨੂੰ ਇਹ ਗੱਲ ਧਿਆਨ ਵਿਚ ਰੱਖਣੀ ਚਾਹੀਦੀ ਹੈ ਕਿ ਜੇ ਕੋਈ ਭਿਆਨਕ ਬੀਮਾਰੀ ਫੈਲ ਗਈ ਤਾਂ ਉਸ ਸਮੇਂ ਕਿਸੇ ਨੇ ਕਿਸੀ ਦੀ ਕੋਈ ਲਿਹਾਜ ਨਹੀਂ ਕਰਨੀ।