– ਨੈਸ਼ਨਲ ਹਾਈਵੇਅ ਬਣੇ ਨੂੰ ਅਜੇ ਮਹਿਜ਼ 5-6 ਸਾਲ ਹੀ ਹੋਏ, ਪਰ ਭ੍ਰਿਸ਼ਟਾਚਾਰ ਅਤੇ ਘਟੀਆ ਨਿਰਮਾਣ ਸਮੱਗਰੀ ਦੀ ਪੋਲ ਖੋਲ੍ਹਣ ਲੱਗੀਆਂ ਪੁਲ ਤੇ ਸਰਵਿਸ ਲੇਨ ਦੀਆਂ ਬਦਹਾਲ ਸੜਕਾਂ

ਮੋਗਾ ਨੈਸ਼ਨਲ ਹਾਈਵੇਅ ’ਤੇ ਆਲੋਵਾਲ ਪੁਲ ਤੋਂ ਲੈ ਕੇ ਕਪੂਰਥਲਾ ਚੌਂਕ ਪੁਲ ਤੱਕ ਦੇ ਲਗਭਗ 5 ਤੋਂ 6 ਕਿਲੋਮੀਟਰ ਲੰਬੇ ਦਾਇਰੇ ਵਿੱਚ ਦੋਵਾਂ ਪਾਸਿਆਂ ਦੀ ਸਰਵਿਸ ਲੇਨ ਇਸ ਸਮੇਂ ਪੂਰੀ ਤਰ੍ਹਾਂ ਬਦਹਾਲੀ ਦਾ ਸ਼ਿਕਾਰ ਹੈ। ਇਸ ਪੂਰੇ ਹਾਈਵੇਅ ਅਤੇ ਪੁਲ ਨੂੰ ਬਣੇ ਅਜੇ ਮਹਿਜ਼ 5 ਤੋਂ 6 ਸਾਲ ਦਾ ਸਮਾਂ ਹੀ ਹੋਇਆ ਹੈ, ਪਰ ਇੰਨੀ ਘੱਟ ਮਿਆਦ ਦੇ ਅੰਦਰ ਹੀ ਮੁੱਖ ਪੁਲ ਅਤੇ ਦੋਵਾਂ ਸਾਈਡਾਂ ਦੀਆਂ ਸਰਵਿਸ ਲੇਨ ਦੀਆਂ ਸੜਕਾਂ ਥਾਂ-ਥਾਂ ਤੋਂ ਬੁਰੀ ਤਰ੍ਹਾਂ ਟੁੱਟਣੀਆਂ ਸ਼ੁਰੂ ਹੋ ਚੁੱਕੀਆਂ ਹਨ। ਸੜਕ ਧੱਸਣ ਕਾਰਨ ਇੱਥੇ 6 ਤੋਂ 7 ਫੁੱਟ ਡੂੰਘੇ ਅਤੇ ਚੌੜੇ ਟੋਏ ਪੈ ਚੁੱਕੇ ਹਨ। ਇਸ ਰੁੱਝੇ ਹੋਏ ਮਾਰਗ ’ਤੇ ਚੌਵੀ ਘੰਟੇ ਭਾਰੀ ਕਮਰਸ਼ੀਅਲ ਵਾਹਨਾਂ ਦਾ ਭਾਰੀ ਰਸ਼ ਰਹਿੰਦਾ ਹੈ, ਜਿਸ ਦੇ ਚਲਦਿਆਂ ਇੱਥੇ ਹਰ ਪਲ ਕਿਸੇ ਵੱਡੇ ਅਤੇ ਭਿਆਨਕ ਹਾਦਸੇ ਦਾ ਖ਼ਦਸ਼ਾ ਬਣਿਆ ਰਹਿੰਦਾ ਹੈ।
ਹੈਰਾਨੀ ਦੀ ਗੱਲ ਇਹ ਹੈ ਕਿ ਪਿਛਲੇ ਕੁਝ ਮਹੀਨਿਆਂ ਦੌਰਾਨ ਹਾਈਵੇਅ ਅਥਾਰਟੀ ਵੱਲੋਂ ਜਿੱਥੇ ਵੀ ਮੁਰੰਮਤ ਦਾ ਕੰਮ ਕੀਤਾ ਜਾਂਦਾ ਹੈ, ਉਸ ਦੇ ਕੁਝ ਹੀ ਦਿਨਾਂ ਬਾਅਦ ਉਸ ਦੇ ਅੱਗੇ-ਪਿੱਛੇ ਦਾ ਅਗਲਾ ਹਿੱਸਾ ਦਰਕ ਕੇ ਹੇਠਾਂ ਧੱਸ ਜਾਂਦਾ ਹੈ। ਆਲਮ ਇਹ ਹੈ ਕਿ ਇਸ 5 ਤੋਂ 6 ਕਿਲੋਮੀਟਰ ਦੇ ਪੂਰੇ ਰੂਟ ’ਤੇ ਦੋਵਾਂ ਪਾਸੇ ਥਾਂ-ਥਾਂ ਪੈਚਵਰਕ (ਮੁਰੰਮਤ) ਦੀ ਚਾਦਰ ਵਿਛ ਚੁੱਕੀ ਹੈ, ਜੋ ਹਾਈਵੇਅ ਦੇ ਨਿਰਮਾਣ ਅਤੇ ਇਸ ਦੀ ਮਜ਼ਬੂਤੀ ’ਤੇ ਇੱਕ ਵੱਡਾ ਸਵਾਲੀਆ ਨਿਸ਼ਾਨ ਲਗਾਉਂਦੀ ਹੈ। ਇਹ ਸਾਬਤ ਕਰਨ ਲਈ ਕਾਫ਼ੀ ਹੈ ਕਿ ਪੂਰੀ ਸੜਕ ਦਾ ਬੇਸ (ਅਧਾਰ) ਬੇਹੱਦ ਕਮਜ਼ੋਰ ਹੋ ਚੁੱਕਾ ਹੈ ਅਤੇ ਇਹ ਭਾਰੀ ਵਾਹਨਾਂ ਦਾ ਲੋਡ ਸਹਿਣ ਦੀ ਸਥਿਤੀ ਵਿੱਚ ਨਹੀਂ ਹੈ।
ਕਾਬਿਲ-ਏ-ਗੌਰ ਹੈ ਕਿ ਕੁਝ ਮਹੀਨੇ ਪਹਿਲਾਂ ਵੀ ਜਿਸ ਜਗ?ਹਾ ’ਤੇ ਹੁਣ ਵੱਡੇ ਟੋਏ ਪਏ ਹਨ, ਉਸ ਤੋਂ ਮਹਿਜ਼ 5-7 ਫੁੱਟ ਦੀ ਦੂਰੀ ’ਤੇ ਅਥਾਰਟੀ ਨੇ ਕੰਕਰੀਟ ਭਰ ਕੇ ਖਾਨਾਪੂਰਤੀ ਕੀਤੀ ਸੀ। ਹੁਣ ਸੋਚਣ ਵਾਲੀ ਗੱਲ ਇਹ ਹੈ ਕਿ ਉਸ ਸਮੇਂ ਹਾਈਵੇਅ ਅਥਾਰਟੀ ਦੇ ਇੰਜੀਨੀਅਰਾਂ ਵੱਲੋਂ ਆਸ-ਪਾਸ ਦੇ ਪੂਰੇ ਏਰੀਏ ਦੀ ਬਾਰੀਕੀ ਨਾਲ ਜਾਂਚ ਕਿਉਂ ਨਹੀਂ ਕੀਤੀ ਗਈ? ਨਤੀਜੇ ਵਜੋਂ, ਦੋ-ਤਿੰਨ ਮਹੀਨਿਆਂ ਬਾਅਦ ਹੀ ਕੋਲ ਦੀ ਸੜਕ ਫਿਰ ਧੱਸ ਗਈ ਅਤੇ ਮਾਰਗ ਦੀ ਮਜ਼ਬੂਤੀ ਪੂਰੀ ਤਰ੍ਹਾਂ ਖ਼ਤਮ ਹੋ ਰਹੀ ਹੈ। ਇਸ ਬਾਰ-ਬਾਰ ਟੁੱਟਦੀ ਸੜਕ ਨੂੰ ਲੈ ਕੇ ਹੁਣ ਖੇਤਰ ਦੇ ਲੋਕਾਂ ਦਾ ਗੁੱਸਾ ਸੱਤਵੇਂ ਆਸਮਾਨ ’ਤੇ ਹੈ ਅਤੇ ਵਿਭਾਗੀ ਕਾਰਜਪ੍ਰਣਾਲੀ ’ਤੇ ਲਗਾਤਾਰ ਸਵਾਲ ਉੱਠ ਰਹੇ ਹਨ।
ਸਭ ਤੋਂ ਵੱਧ ਚਿੰਤਾਜਨਕ ਗੱਲ ਇਹ ਹੈ ਕਿ ਇਨ੍ਹਾਂ ਡੂੰਘੇ ਟੋਇਆਂ ਦੇ ਰਸਤੇ ਬਾਰਿਸ਼ ਦਾ ਪਾਣੀ ਪੁਲ ਦੇ ਹੇਠਾਂ ਅਤੇ ਉਸ ਦੀ ਨੀਂਹ (ਫਾਊਂਡੇਸ਼ਨ) ਤੱਕ ਪਹੁੰਚ ਰਿਹਾ ਹੈ। ਜੇਕਰ ਪਾਣੀ ਦਾ ਇਹ ਰਿਸਾਅ ਇਸੇ ਤਰ੍ਹਾਂ ਜਾਰੀ ਰਿਹਾ, ਤਾਂ ਪੁਲ ਦੀ ਨੀਂਹ ਕਮਜ਼ੋਰ ਹੋ ਸਕਦੀ ਹੈ ਅਤੇ ਮੁੱਖ ਹਾਈਵੇਅ ਪੁਲ ਨੂੰ ਗੰਭੀਰ ਨੁਕਸਾਨ ਪਹੁੰਚ ਸਕਦਾ ਹੈ। ਸਥਾਨਕ ਨਿਵਾਸੀਆਂ ਦਾ ਕਹਿਣਾ ਹੈ ਕਿ ਅਜੇ ਤਾਂ ਮਾਨਸੂਨ ਦੀਆਂ ਬਾਰਿਸ਼ਾਂ ਸ਼ੁਰੂ ਵੀ ਨਹੀਂ ਹੋਈਆਂ, ਉਦੋਂ ਇਹ ਹਾਲ ਹੈ। ਬਿਨਾਂ ਬਾਰਿਸ਼ ਦੇ ਹੀ ਸੜਕ ਦਾ ਇਸ ਤਰ੍ਹਾਂ ਟੁਕੜਿਆਂ ਵਿੱਚ ਟੁੱਟਣਾ ਅਤੇ ਥਾਂ-ਥਾਂ ਪੈਚਵਰਕ ਹੋਣਾ ਇਸ ਦੇ ਨਿਰਮਾਣ ਵਿੱਚ ਵਰਤੀ ਗਈ ਘਟੀਆ ਸਮੱਗਰੀ (ਮਟੀਰੀਅਲ) ਵੱਲ ਸਾਫ਼ ਇਸ਼ਾਰਾ ਕਰਦਾ ਹੈ।
ਇਸ ਗੰਭੀਰ ਸਥਿਤੀ ਨੂੰ ਦੇਖਦੇ ਹੋਏ ਇਲਾਕਾ ਨਿਵਾਸੀਆਂ ਨੇ ਸਰਕਾਰ ਅਤੇ ਉੱਚ ਅਧਿਕਾਰੀਆਂ ਤੋਂ ਪੁਰਜ਼ੋਰ ਮੰਗ ਕੀਤੀ ਹੈ ਕਿ ਪੂਰੀ 5-6 ਕਿਲੋਮੀਟਰ ਦੀ ਸਰਵਿਸ ਲੇਨ ’ਤੇ ਟੁਕੜਿਆਂ-ਟੁਕੜਿਆਂ ਵਿੱਚ ਸਿਰਫ਼ ਪੈਚਵਰਕ ਜਾਂ ਲੀਪਾਪੋਤੀ ਕਰਨ ਦੇ ਬਜਾਏ, ਇਸ ਦੇ ਨਿਰਮਾਣ ਵਿੱਚ ਵਰਤੇ ਗਏ ਮਟੀਰੀਅਲ ਦੀ ਤੁਰੰਤ ਉੱਚ ਪੱਧਰੀ ਵਿਜੀਲੈਂਸ ਜਾਂ ਤਕਨੀਕੀ ਜਾਂਚ ਕਰਵਾਈ ਜਾਵੇ। ਲੋਕਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਕਿਸੇ ਵੱਡੇ ਜਾਨੀ-ਮਾਲੀ ਨੁਕਸਾਨ ਦਾ ਇੰਤਜ਼ਾਰ ਕੀਤੇ ਬਿਨਾਂ ਮਾਨਸੂਨ ਦੀ ਭਾਰੀ ਬਾਰਿਸ਼ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਇਸ ਪੂਰੀ ਸੜਕ ਨੂੰ ਨਵੇਂ ਸਿਰੇ ਤੋਂ ਮੁਕੰਮਲ ਤੌਰ ’ਤੇ ਮਜ਼ਬੂਤ ਬਣਾਇਆ ਜਾਵੇ, ਤਾਂ ਜੋ ਰਾਹਗੀਰਾਂ ਦੀ ਜਾਨ ਸੁਰੱਖਿਅਤ ਰਹਿ ਸਕੇ ਅਤੇ ਕਿਸੇ ਵੱਡੇ ਹਾਦਸੇ ਨੂੰ ਟਾਲਿਆ ਜਾ ਸਕੇ।