ਸਰਪੰਚਾਂ ਦੀ ਤਰਾਂ ਪੰਚਾਂ ਨੂੰ ਵੀ ਮਿਲੇ 10 ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਭੱਤਾ – ਕੰਗ

ਪੰਜਾਬ ਦੇ ਸੀਨੀਅਰ ਆਗੂ ਅਤੇ ਸਾਬਕਾ ਮੰਤਰੀ ਜਗਮੋਹਨ ਸਿੰਘ ਕੰਗ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਇਹ ਬੜੀ ਹਾਸੋਹੀਣੀ ਅਤੇ ਹੈਰਾਨੀ ਵਾਲੀ ਗੱਲ ਹੈ ਕਿ ਵਿਧਾਨ ਸਭਾ ਚੋਣਾਂ ਨੂੰ ਦੇਖਦਿਆਂ ਮਾਨ ਸਰਕਾਰ ਨੇ ਸਹੂਲਤਾਂ ਅਤੇ ਤੋਹਫਿਆ ਦੀ ਝੜੀ ਲਗਾ ਦਿੱਤੀ ਹੈ ਜਿਵੇਂ ਕਿ ਪੌਣੇ ਪੰਜ ਸਾਲਾਂ ਤੋਂ ਮੈਨੀਫੈਸਟੋ ਵਿੱਚ ਐਲਾਨਿਆ/ਰੁਕਿਆ ਹੋਇਆ ਔਰਤਾਂ ਦਾ ਮਹੀਨਾਵਾਰ 1000/1500 ਰੁਪਏ ਦਾ ਭੱਤਾ ਦੇਣਾ, ਲਿੰਕ ਸੜਕਾਂ ਨੂੰ ਤੁਰੰਤ ਬਣਾਉਣ ਅਤੇ ਰਾਸ਼ਨ ਦੀਆਂ ਮੁਫਤ ਕਿੱਟਾਂ ਆਦਿ ਦੇਣਾ ਸਰਕਾਰ ਨੂੰ ਹੁਣ ਯਾਦ ਆਇਆ ਹੈ।
ਉਨਾਂ ਕਿਹਾ ਕਿ ਹੁਣ ਸਰਪੰਚਾਂ ਨੂੰ 10,000 ਰੁਪਏ ਮਹੀਨਾ ਦੇਣ ਦਾ ਐਲਾਨ ਕਰਨਾ ਇੱਕ ‘ਚੋਣ ਸਟੰਟ’ ਤੋਂ ਇਲਾਵਾ ਹੋਰ ਕੁਝ ਨਹੀਂ ਹੈ। ਸੂਤਰਾਂ ਮੁਤਾਬਕ ਇਸ ਤੋਂ ਪਹਿਲਾਂ ਸੂਬੇ ਵਿੱਚ ਸਰਪੰਚਾਂ ਦਾ ਮਹੀਨਾਵਾਰ ਭੱਤਾ ਸਿਰਫ 1,200 ਰੁਪਏ ਸੀ, ਪਰ ਉਹ ਵੀ ਕਦੇ ਮਿਲਿਆ ਨਹੀਂ।
ਉਨਾਂ ਸਰਕਾਰ ਨੂੰ ਪੁੱਛਿਆ ਕਿ ਹੁਣ 10,000 ਰੁਪਏ ਪ੍ਰਤੀ ਮਹੀਨਾ ਦੇਣ ਲਈ ਸਰਕਾਰ ਕੋਲ ਫੰਡ ਕਿੱਥੋਂ ਆਉਣਗੇ? (ਜਦੋਂ ਕਿ ਬੇਮਿਸਾਲ ਕਰਜਈ ਸਰਕਾਰ ਕਰਜੇ ਤੇ ਕਰਜਾ ਲੈ ਰਹੀ ਹੈ) ਇਸ ਦੇ ਨਾਲ ਹੀ ਇਸ ਐਲਾਨ ਵਿੱਚ ਪੰਚਾਂ ਨੂੰ ਕਿਉਂ ਛੱਡ ਦਿੱਤਾ ਗਿਆ, ਉਨਾਂ ਨਾਲ ਇਹ ਵਿਤਕਰਾ ਕਿਉਂ? ਕਿਉਂਕਿ ਉਹ ਵੀ ਪਿੰਡ ਦੇ ਚੁਣੇ ਹੋਏ ਨੁਮਾਇੰਦੇ ਹਨ।
ਉਨਾਂ ਕਿਹਾ ਕਿ ਅੱਜ ਦੇ ਮਹਿੰਗਾਈ ਦੇ ਦੌਰ ਵਿੱਚ ਸਰਕਾਰ ਨੂੰ ਸਰਪੰਚਾਂ ਨੂੰ ਘੱਟੋ-ਘੱਟ 20,000 ਰੁਪਏ ਪ੍ਰਤੀ ਮਹੀਨਾ ਅਤੇ ਪੰਚਾਂ ਨੂੰ 10,000 ਰੁਪਏ ਪ੍ਰਤੀ ਮਹੀਨਾ ਭੱਤਾ ਦੇਣਾ ਬਣਦਾ ਹੈ ਅਤੇ ਯਕੀਨੀ ਬਣਾਉਣਾ ਚਾਹੀਦਾ ਹੈ।