ਭੈਰੋਮੂੰਨਾ ਵਿਖੇ ਤੇਲ ਰਿਫਾਇਨਰੀ ਵਿੱਚ ਭੱਠੀ ਫਟਣ ਨਾਲ ਲੱਗੀ ਭਿਆਨਕ ਅੱਗ, ਲੱਖਾਂ ਰੁਪਏ ਦੇ ਤੇਲ ਦਾ ਨੁਕਸਾਨ

ਭੈਰੋਮੂੰਨਾ ਵਿਖੇ ਸਥਿਤ ਇੱਕ ਮੋਬਾਇਲ ਤੇਲ ਰਿਫਾਇਨਰੀ ਵਿੱਚ ਬੀਤੇ ਦਿਨ ਸੁ?ਕਰਵਾਰ ਬਾਅਦ ਦੁਪਹਿਰ ਅਚਾਨਕ ਅੱਗ ਲੱਗਣ ਕਾਰਨ ਹਫੜਾ-ਦਫੜੀ ਮੱਚ ਗਈ। ਮੁੱਢਲੀ ਜਾਣਕਾਰੀ ਅਨੁਸਾਰ ਬਿਜਲੀ ਦੇ ਸ਼ਾਰਟ ਸਰਕਟ ਤੋਂ ਬਾਅਦ ਤੇਲ ਦੀ ਭੱਠੀ ਵਿੱਚ ਜ਼ੋਰਦਾਰ ਧਮਾਕਾ ਹੋਇਆ, ਜਿਸ ਕਾਰਨ ਰਿਫਾਇਨਰੀ ਦੇ ਸ਼ੈੱਡ ਦੇ ਪਰਖੱਚੇ ਉੱਡ ਗਏ। ਧਮਾਕੇ ਕਾਰਨ ਨੇੜੇ ਰੱਖੇ ਤੇਲ ਦੇ ਕਈ ਡਰੰਮ ਵੀ ਨੁਕਸਾਨੇ ਗਏ ਅਤੇ ਉਨ੍ਹਾਂ ਵਿੱਚੋਂ ਤੇਲ ਲੀਕ ਹੋ ਗਿਆ।
ਅੱਗ ਲੱਗਣ ਸਮੇਂ ਮੌਕੇ ’ਤੇ ਮੌਜੂਦ ਲੇਬਰ ਵੱਲੋਂ ਤੁਰੰਤ ਪਾਣੀ ਵਾਲੀ ਮੋਟਰ ਚਾਲੂ ਕਰਕੇ ਪਾਈਪਾਂ ਦੀ ਮਦਦ ਨਾਲ ਅੱਗ ’ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕੀਤੀ ਗਈ। ਫੈਕਟਰੀ ਮਾਲਕ ਸਨੀ ਕੁਮਾਰ ਵੱਲੋਂ ਘਟਨਾ ਦੀ ਸੂਚਨਾ ਲੁਧਿਆਣਾ ਫਾਇਰ ਸਟੇਸ਼ਨ ਅਤੇ ਸਬੰਧਿਤ ਥਾਣਾ ਕੂੰਮਕਲਾਂ ਨੂੰ ਦਿੱਤੀ ਗਈ।
ਸੂਚਨਾ ਮਿਲਦੇ ਹੀ ਸਬੰਧਿਤ ਪੁਲਿਸ ਚੌਕੀ ਤੋਂ ਏਐਸਆਈ ਸਵਰਨ ਸਿੰਘ ਪੁਲਿਸ ਟੀਮ ਸਮੇਤ ਮੌਕੇ ’ਤੇ ਪਹੁੰਚੇ। ਇਸ ਤੋਂ ਕੁਝ ਸਮੇਂ ਬਾਅਦ ਲੁਧਿਆਣਾ ਫੋਕਲ ਪੁਆਇੰਟ ਤੋਂ ਤਿੰਨ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਵੀ ਮੌਕੇ ’ਤੇ ਪਹੁੰਚ ਗਈਆਂ ਅਤੇ ਫਾਇਰ ਕਰਮਚਾਰੀਆਂ ਨੇ ਕਾਫੀ ਮੁਸ਼ੱਕਤ ਤੋਂ ਬਾਅਦ ਅੱਗ ’ਤੇ ਕਾਬੂ ਪਾ ਲਿਆ।
ਰਾਹਤ ਦੀ ਗੱਲ ਇਹ ਰਹੀ ਕਿ ਇਸ ਅਗਨੀਕਾਂਡ ਦੌਰਾਨ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ। ਹਾਲਾਂਕਿ ਫੈਕਟਰੀ ਮਾਲਕ ਅਨੁਸਾਰ ਅੱਗ ਕਾਰਨ ਕਈ ਤੇਲ ਦੇ ਡਰੰਮਾਂ ਵਿੱਚ ਪਿਆ ਤੇਲ ਸੜਨ ਅਤੇ ਲੀਕ ਹੋਣ ਕਾਰਨ ਲੱਖਾਂ ਰੁਪਏ ਦਾ ਮਾਲੀ ਨੁਕਸਾਨ ਹੋਇਆ ਹੈ।
ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਅੱਗ ਲੱਗਣ ਦੇ ਅਸਲ ਕਾਰਨਾਂ ਦਾ ਪਤਾ ਜਾਂਚ ਤੋਂ ਬਾਅਦ ਹੀ ਲੱਗ ਸਕੇਗਾ