ਭਾਰਤ ਹੁਣ ਅਮਰੀਕਾ ਤੋਂ ਖਰੀਦੇਗਾ ਦੁਨੀਆ ਦਾ ਸਭ ਤੋਂ ਖਤਰਨਾਕ ਐਂਟੀ-ਟੈਂਕ ਮਿਜ਼ਾਈਲ ਸਿਸਟਮ ‘ਜੈਵਲਿਨ’

ਭਾਰਤ ਨੇ ਜੰਗ ਦੇ ਮੈਦਾਨ ’ਚ ਪਰਖੇ ਜਾ ਚੁੱਕੇ ਅਮਰੀਕੀ ਜੈਵਲਿਨ ਐਂਟੀ-ਟੈਂਕ ਮਿਜ਼ਾਈਲ ਸਿਸਟਮ ਨੂੰ ਖਰੀਦਣ ਦੀ ਯੋਜਨਾ ਬਣਾਈ ਹੈ। ਭਾਰਤ ’ਚ ਅਮਰੀਕਾ ਦੇ ਰਾਜਦੂਤ ਸਰਜਿਓ ਗੋਰ ਨੇ ਸ਼ੁੱਕਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਇਹ ਕਦਮ ਦੁਸ਼ਮਣ ਦੇ ਬਖ਼ਤਰਬੰਦ ਵਾਹਨਾਂ ਦਾ ਸਾਹਮਣਾ ਕਰਨ ਦੀ ਭਾਰਤੀ ਹਥਿਆਰਬੰਦ ਫ਼ੌਜਾਂ ਦੀ ਸਮਰੱਥਾ ਨੂੰ ਹੋਰ ਮਜ਼ਬੂਤ ਕਰ ਸਕਦਾ ਹੈ। ਇਹ ਪ੍ਰਸਤਾਵਿਤ ਖਰੀਦ ਭਾਰਤ ਦੇ ਹਥਿਆਰਖਾਨੇ ’ਚ ਇਕ ਬਹੁਤ ਹੀ ਮੋਬਾਈਲ ਤੇ ਸਟੀਕ ਮਾਰ ਕਰਨ ਦੀ ਸਮਰੱਥਾ ਵਾਲੇ ਐਂਟੀ-ਆਰਮਰ ਹਥਿਆਰ ਨੂੰ ਸ਼ਾਮਲ ਕਰੇਗੀ। ਭਾਰਤ ਸਰਕਾਰ ਇਹ ਕਦਮ ਅਜਿਹੇ ਸਮੇਂ ਚੁੱਕ ਰਹੀ ਹੈ, ਜਦੋਂ ਉਹ ਵਾਸ਼ਿੰਗਟਨ ਨਾਲ ਆਪਣੇ ਰੱਖਿਆ ਸਹਿਯੋਗ ਦਾ ਲਗਾਤਾਰ ਵਿਸਥਾਰ ਕਰ ਰਹੀ ਹੈ ਅਤੇ ਆਪਣੀਆਂ ਫੌਜੀ ਸਮਰੱਥਾਵਾਂ ’ਚ ਵਿਭਿੰਨਤਾ ਲਿਆ ਰਹੀ ਹੈ।
ਜੈਵਲਿਨ ਇੱਕ ਮੈਨ-ਪੋਰਟੇਬਲ ਅਤੇ ਮੋਢੇ ਤੋਂ ਦਾਗੀ ਜਾਣ ਵਾਲੀ ਐਂਟੀ-ਟੈਂਕ ਗਾਈਡਿਡ ਮਿਜ਼ਾਈਲ ਹੈ, ਜਿਸ ਨੂੰ ਅਮਰੀਕੀ ਰੱਖਿਆ ਕੰਪਨੀਆਂ ਲੌਕਹੀਡ ਮਾਰਟਿਨ ਤੇ ਆਰਟੀਐਕਸ ਨੇ ਵਿਕਸਤ ਕੀਤਾ ਹੈ। ਇਸ ਨੂੰ ਇਸ ਤਰ੍ਹਾਂ ਡਿਜ਼ਾਈਨ ਕੀਤਾ ਗਿਆ ਹੈ ਕਿ ਇਨਫੈਂਟਰੀ ਦੀਆਂ ਟੁਕੜੀਆਂ ਕਿਸੇ ਵੱਡੇ ਐਂਟੀ-ਟੈਂਕ ਪਲੇਟਫਾਰਮ ’ਤੇ ਨਿਰਭਰ ਹੋਏ ਬਿਨਾਂ ਹੀ ਦੁਸ਼ਮਣ ਦੇ ਬਖ਼ਤਰਬੰਦ ਵਾਹਨਾਂ ’ਤੇ ਹਮਲਾ ਕਰ ਸਕਣ।
ਇਸ ਦੀਆਂ ਸਭ ਤੋਂ ਪ੍ਰਮੁੱਖ ਵਿਸ਼ੇਸ਼ਤਾਵਾਂ ’ਚੋਂ ਇਕ ਇਸ ਦੀ ਦਾਗੋ ਤੇ ਭੁੱਲ ਜਾਓ ਸਮਰੱਥਾ ਹੈ। ਇਕ ਵਾਰ ਮਿਜ਼ਾਈਲ ਲਾਂਚ ਹੋਣ ਅਤੇ ਨਿਸ਼ਾਨਾ ਲੌਕ ਹੋ ਜਾਣ ਤੋਂ ਬਾਅਦ, ਆਪਰੇਟਰ ਨੂੰ ਇਸ ਨੂੰ ਲਗਾਤਾਰ ਗਾਈਡ ਕਰਨ ਦੀ ਲੋੜ ਨਹੀਂ ਹੁੰਦੀ। ਇਸ ਨਾਲ ਫ਼ੌਜੀਆਂ ਨੂੰ ਮਿਜ਼ਾਈਲ ਦਾਗਣ ਤੋਂ ਤੁਰੰਤ ਬਾਅਦ ਆਪਣੀ ਥਾਂ ਤੋਂ ਸੁਰੱਖਿਅਤ ਹਟਣ ਦਾ ਮੌਕਾ ਮਿਲ ਜਾਂਦਾ ਹੈ।
ਇਹ ਮਿਜ਼ਾਈਲ ਟੈਂਕਾਂ ’ਤੇ ਉੱਪਰੋਂ ਵੀ ਹਮਲਾ ਕਰ ਸਕਦੀ ਹੈ, ਜਿਸ ਨੂੰ ਟੌਪ-ਅਟੈਕ ਫੀਚਰ ਕਿਹਾ ਜਾਂਦਾ ਹੈ। ਇਹ ਸਹੂਲਤ ਬਖ਼ਤਰਬੰਦ ਵਾਹਨ ਦੇ ਉੱਪਰੀ ਅਤੇ ਸਭ ਤੋਂ ਕਮਜ਼ੋਰ ਹਿੱਸੇ ’ਤੇ ਸਟੀਕ ਵਾਰ ਕਰਨ ਦੀ ਸਮਰੱਥਾ ਦਿੰਦੀ ਹੈ। ਇਸ ਤੋਂ ਇਲਾਵਾ, ਇਸ ਨੂੰ ਕੁਝ ਖਾਸ ਨਿਸ਼ਾਨਿਆਂ ਦੇ ਖ਼?ਲਾਫ਼ ਡਾਇਰੈਕਟ-ਅਟੈਕ ਮੋਡ ਵਿੱਚ ਵੀ ਵਰਤਿਆ ਜਾ ਸਕਦਾ ਹੈ।
ਇਹ ਕਦਮ ਨਾ ਸਿਰਫ਼ ਭਾਰਤੀ ਫੌਜ ਨੂੰ ਇੱਕ ਉੱਨਤ ਅਮਰੀਕੀ ਐਂਟੀ-ਟੈਂਕ ਸਿਸਟਮ ਤਕ ਪਹੁੰਚ ਪ੍ਰਦਾਨ ਕਰੇਗਾ, ਸਗੋਂ ਸੰਭਾਵੀ ਤੌਰ ’ਤੇ ਦੋਵਾਂ ਦੇਸ਼ਾਂ ਵਿਚਕਾਰ ਨਜ਼ਦੀਕੀ ਰੱਖਿਆ-ਉਦਯੋਗਿਕ ਸਹਿਯੋਗ ਦੇ ਮੌਕੇ ਵੀ ਪੈਦਾ ਕਰ ਸਕਦਾ ਹੈ।
ਇਸ ਲਈ ਤਜਵੀਜ਼ਸ਼ੁਦਾ ਜੈਵਲਿਨ ਪ੍ਰਾਪਤੀ ਦੋ ਮੋਰਚਿਆਂ ’ਤੇ ਮਹੱਤਵ ਰੱਖਦੀ ਹੈ। ਇਹ ਭਾਰਤ ਦੀ ਜੰਗ ਦੇ ਮੈਦਾਨ ’ਚ ਐਂਟੀ-ਆਰਮਰ ਸਮਰੱਥਾ ਨੂੰ ਮਜ਼ਬੂਤ ਕਰ ਸਕਦੀ ਹੈ ਅਤੇ ਨਾਲ ਹੀ ਨਵੀਂ ਦਿੱਲੀ ਦੀਆਂ ਸਭ ਤੋਂ ਮਹੱਤਵਪੂਰਨ ਰੱਖਿਆ ਭਾਈਵਾਲੀਆਂ ’ਚੋਂ ਇਕ ਨੂੰ ਹੋਰ ਮਜ਼ਬੂਤ ਕਰ ਸਕਦੀ ਹੈ।