ਭੁਪੇਸ਼ ਬਘੇਲ ਦੀਆਂ ਕੋਸ਼ਿਸਾਂ ਵੀ ਨਹੀਂ ਕਰ ਸਕੀਆਂ ਕਾਂਗਰਸ ਨੂੰ ਇੱਕਜੁਟ ਮੁਹਾਲੀ ’ਚ ਹੋਈ ਭਰਵੀਂ ਰੈਲੀ ਵਿਚ ਚੰਨੀ ਸਮੇਤ ਸੀਨੀਅਰ ਆਗੂ ਲਾਪਤਾ

ਭਾਵੇਂ ਪੰਜਾਬ ਕਾਂਗਰਸ ਦੇ ਇੰਚਾਰਜ ਭੁਪੇਸ਼ ਬਘੇਲ ਦੇ ਰਾਜ ਵਿਚ ਕਾਂਗਰਸ ਦੇ ਵੱਖ-ਵੱਖ ਧੜਿਆਂ ਨੂੰ ਇੱਕ ਮੰਚ ਉਤੇ ਲੈ ਕੇ ਆਉਣ ਦੀ ਪੂਰੀ ਕੋਸ਼ਿਸ਼ ਕਰ ਰਹੇ ਹਨ ਪਰ ਕੱਲ ਇਥੇ ਹੋਈ ਕਾਂਗਰਸ ਪਾਰਟੀ ਦੀ ਜਿਲਾ ਮੁਹਾਲੀ ਦੀ ਭਰਵੀਂ ਰੈਲੀ ਵਿਚ ਇਹ ਗੱਲ ਖੁੱਲ ਕੇ ਸਾਹਮਣੇ ਆਈ ਹੈ ਕਿ ਅੱਜ ਵੀ ਕਾਂਗਰਸ ਵੱਖ-ਵੱਖ ਧੜਿਆਂ ਵਿਚ ਵੰਡੀ ਹੋਈ ਹੈ।
ਕੱਲ ਇਥੇ ਹੋਈ ਮੀਟਿੰਗ ਵਿਚ ਖਰੜ ਦੇ ਜੰਮਪਲ ਅਤੇ ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਅਤੇ ਉਨਾਂ ਦਾ ਧੜਾ ਮੀਟਿੰਗ ਵਿਚ ਨਹੀਂ ਪਹੁੰਚਿਆ। ਭਾਵੇਂ ਮੀਟਿੰਗ ਵਿਚ ਇਕੱਠ ਭਰਵਾਂ ਸੀ ਪਰ ਚੰਨੀ ਜਿਸ ਦਾ ਇਸ ਖੇਤਰ ਵਿਚ ਬਹੁਤ ਅਸਰ ਰਸੂਖ ਹੈ, ਦਾ ਇਸ ਮੀਟਿੰਗ ਵਿਚ ਨਾ ਪਹੁੰਚਣਾ ਸਾਰਿਆਂ ਨੂੰ ਰੜਕਦਾ ਰਿਹਾ। ਇੰਝ ਹੀ ਕਾਂਗਰਸ ਪ੍ਰਧਾਨ ਰਾਜਾ ਵੜਿੰਗ ਦੇ ਵਿਰੋਧੀ ਆਗੂ ਅਤੇ ਇਥੋਂ ਤੱਕ ਕਿ ਪੰਜਾਬ ਵਿਚ ਵਿਰੋਧੀ ਧਿਰ ਦੇ ਨੇਤਾ ਪ੍ਰਤਾਪ ਸਿੰਘ ਬਾਜਵਾ ਨੇ ਇਸ ਰੈਲੀ ਵਿਚ ਭਾਗ ਨਹੀਂ ਲਿਆ। ਐਨੇ ਆਗੂਆਂ ਦੇ ਨਾ ਆਉਣ ਕਾਰਨ ਵਰਕਰਾਂ ਵਿਚ ਭੰਬਲਭੂਸਾ ਪੈਦਾ ਹੋ ਜਾਂਦਾ ਹੈ।
ਜਦੋਂ ਪੱਤਰਕਾਰਾਂ ਨੇ ਇਸ ਸਬੰਧੀ ਭੁਪੇਸ਼ ਬਘੇਲ ਨੂੰ ਪੁੱਛਿਆ ਵੀ ਤਾਂ ਉਹ ਕੋਈ ਸਪੱਸਟ ਉਤਰ ਨਹੀਂ ਦੇ ਸਕੇ। ਇਸ ਤਰੀਕੇ ਨਾਲ ਇਹ ਗੱਲ ਸਪਸੱਟ ਨਜ਼ਰ ਆਉਂਦੀ ਹੈ ਕਿ ਉਹ ਪਾਰਟੀ ਵਿਚ ਧੜੇਬੰਦੀ ਨੂੰ ਖਤਮ ਕਰਨ ਵਿਚ ਸਫਲ ਨਹੀਂ ਹੋ ਸਕੇ ਹਨ। ਲੋਕਾਂ ਵਿਚ ਇਸ ਗੱਲ ਨੂੰ ਲੈ ਕੇ ਵੀ ਚਰਚਾ ਹੈ ਕਿ ਕਾਂਗਰਸ ਹਾਈ ਕਮਾਂਡ ਅਤੇ ਭੁਪੇਸ਼ ਬਘੇਲ ਪਾਰਟੀ ਦੀ ਇਸ ਲੜਾਈ ਨੂੰ ਖਤਮ ਨਹੀਂ ਕਰਵਾ ਸਕੀਆਂ ਹਨ। ਕੱਲ ਦਾ ਪ੍ਰੋਗਰਾਮ ਇਸ ਲਈ ਉਲੀਕਿਆ ਗਿਆ ਸੀ ਕਿ ਬੂਥ ਲੈਵਲ ਉਤੇ ਪਾਰਟੀ ਨੂੰ ਮਜਬੂਤ ਕਰਨਾ ਹੈ। ਜਦੋਂ ਸਾਰੇ ਆਗੂ ਹੀ ਇਕੱਠੇ ਨਾ ਹੋਣ ਅਤੇ ਪਾਰਟੀ ਇੱਕ ਦੂਜੇ ਦੇ ਵਿਰੋਧ ਵਿਚ ਕੰਮ ਕਰ ਰਹੇ ਹਨ ਤਾਂ ਪਾਰਟੀ ਬੂਥ ਲੈਵਲ ਤੇ ਕਿਵੇਂ ਮਜਬੂਤ ਹੋਵੇਗੀ, ਇਹ ਸੋਚਣ ਵਾਲੀ ਗੱਲ ਹੈ।