ਅੰਬਾਲਾ ਰਿੰਗ ਰੋਡ ਨਾਲ ਪਿੰਡ ਪੰਜੋਖਰਾ ਸਾਹਿਬ ਆਉਣਾ-ਜਾਣਾ ਹੋਵੇਗਾ ਆਸਾਨ, ਪਿੰਡ ਵਿੱਚ ਤਿੰਨ ਅੰਡਰਪਾਸ ਅਤੇ ਡੇਢ ਕਿਲੋਮੀਟਰ ਲੰਬੀ ਸਰਵਿਸ ਲੇਨ ਬਣੇਗੀ : ਹਰਿਆਣਾ ਦੇ ਊਰਜਾ ਮੰਤਰੀ ਅਨਿਲ ਵਿਜ

ਹਰਿਆਣਾ ਦੇ ਊਰਜਾ, ਪਰਿਵਹਨ ਅਤੇ ਸ਼੍ਰਮ ਮੰਤਰੀ ਸ੍ਰੀ ਅਨਿਲ ਵਿਜ ਨੇ ਕਿਹਾ ਕਿ ਅੰਬਾਲਾ ਵਿੱਚ ਬਣ ਰਹੀ ਰਿੰਗ ਰੋਡ ਨਾਲ ਪਿੰਡ ਪੰਜੋਖਰਾ ਸਾਹਿਬ ਵੱਲ ਆਉਣਾ-ਜਾਣਾ ਜਲਦੀ ਹੀ ਆਸਾਨ ਹੋ ਜਾਵੇਗਾ। ਰਿੰਗ ਰੋਡ ਤੱਕ ਪਹੁੰਚ ਲਈ ਪਿੰਡ ਪੰਜੋਖਰਾ ਸਾਹਿਬ ਵਿੱਚ ਨੈਸ਼ਨਲ ਹਾਈਵੇ ਅਥਾਰਟੀ ਆਫ ਇੰਡੀਆ (ਐਨਐਚਏਆਈ) ਵੱਲੋਂ ਤਿੰਨ ਅੰਡਰਪਾਸ ਅਤੇ ਲਗਭਗ ਡੇਢ ਕਿਲੋਮੀਟਰ ਲੰਬੀ ਸਰਵਿਸ ਲੇਨ ਬਣਾਈ ਜਾ ਰਹੀ ਹੈ।
ਸ੍ਰੀ ਵਿਜ ਅੱਜ ਅੰਬਾਲਾ ਛਾਵਨੀ ਵਿੱਚ ਆਪਣੇ ਨਿਵਾਸ ‘ਤੇ ਐਨਐਚਏਆਈ ਦੇ ਅਧਿਕਾਰੀਆਂ ਨਾਲ ਚਰਚਾ ਕਰਨ ਤੋਂ ਬਾਅਦ ਪਿੰਡ ਪੰਜੋਖਰਾ ਸਾਹਿਬ ਦੇ ਵਸਨੀਕਾਂ ਨਾਲ ਗੱਲਬਾਤ ਕਰ ਰਹੇ ਸਨ।
ਉਨ੍ਹਾਂ ਕਿਹਾ ਕਿ ਰਿੰਗ ਰੋਡ ਦੇ ਦੂਜੇ ਪਾਸੇ ਜਾਣ ਲਈ ਵੀ ਪਿੰਡ ਦੇ ਲੋਕਾਂ ਨੂੰ ਕੋਈ ਦਿੱਕਤ ਨਹੀਂ ਹੋਵੇਗੀ ਕਿਉਂਕਿ ਨਿਸ਼ਚਿਤ ਦੂਰੀ ‘ਤੇ ਤਿੰਨ ਅੰਡਰਪਾਸ ਬਣਾਏ ਗਏ ਹਨ। ਉਨ੍ਹਾਂ ਦੱਸਿਆ ਕਿ ਗੁਰਦੁਆਰਾ ਸਾਹਿਬ ਦੇ ਬਿਲਕੁਲ ਕੋਲੋਂ ਇੱਕ ਸਰਵਿਸ ਲੇਨ ਵੀ ਤਿਆਰ ਕੀਤੀ ਜਾ ਰਹੀ ਹੈ ਜਿਸਦੀ ਕਨੈਕਟਿਵਿਟੀ ਸਿੱਧੀ ਰਿੰਗ ਰੋਡ ਨਾਲ ਹੋਵੇਗੀ।
ਇਸ ਤੋਂ ਪਹਿਲਾਂ ਐਨਐਚਏਆਈ ਦੇ ਪ੍ਰੋਜੈਕਟ ਡਾਇਰੈਕਟਰ ਪੀ.ਕੇ. ਸਿੰਹਾ ਨੇ ਸ੍ਰੀ ਅਨਿਲ ਵਿਜ ਨੂੰ ਜਾਣਕਾਰੀ ਦਿੱਤੀ ਕਿ ਰਿੰਗ ਰੋਡ ‘ਤੇ ਬਣ ਰਹੇ ਤਿੰਨ ਅੰਡਰਪਾਸ ਜੜੌਤ-ਪੰਜੋਖਰਾ ਸਾਹਿਬ ਰੋਡ, ਬਸੌਲੀ-ਪੰਜੋਖਰਾ ਸਾਹਿਬ ਰੋਡ ਅਤੇ ਤਿਸੰਬਲੀ-ਪੰਜੋਖਰਾ ਸਾਹਿਬ ਰੋਡ ‘ਤੇ ਸਥਿਤ ਹਨ। ਇਨ੍ਹਾਂ ਅੰਡਰਪਾਸਾਂ ਰਾਹੀਂ ਪਿੰਡ ਦੇ ਵਸਨੀਕ ਰਿੰਗ ਰੋਡ ਦੇ ਦੋਹਾਂ ਪਾਸਿਆਂ ਆਸਾਨੀ ਨਾਲ ਆ-ਜਾ ਸਕਣਗੇ ਅਤੇ ਸਰਵਿਸ ਲੇਨ ਰਾਹੀਂ ਰਿੰਗ ਰੋਡ ‘ਤੇ ਵੀ ਚੜ੍ਹ ਸਕਣਗੇ।
ਗੌਰਤਲਬ ਹੈ ਕਿ ਪਹਿਲਾਂ ਪਿੰਡ ਪੰਜੋਖਰਾ ਸਾਹਿਬ ਦੇ ਵਸਨੀਕਾਂ ਨੇ ਊਰਜਾ ਮੰਤਰੀ ਅਨਿਲ ਵਿਜ ਨਾਲ ਮਿਲ ਕੇ ਰਿੰਗ ਰੋਡ ਤੱਕ ਆਉਣਾ-ਜਾਣਾ ਸੁਗਮ ਬਣਾਉਣ ਲਈ ਸਰਵਿਸ ਲੇਨ ਬਣਾਉਣ ਦੀ ਮੰਗ ਕੀਤੀ ਸੀ, ਜੋ ਹੁਣ ਪੂਰੀ ਕੀਤੀ ਜਾ ਰਹੀ ਹੈ।
ਸ੍ਰੀ ਅਨਿਲ ਵਿਜ ਦੇ ਯਤਨਾਂ ਨਾਲ ਅੰਬਾਲਾ ਵਿੱਚ ਲਗਭਗ 40 ਕਿਲੋਮੀਟਰ ਲੰਬੀ ਸਿਕਸ ਲੇਨ ਗ੍ਰੀਨਫੀਲਡ ਰਿੰਗ ਰੋਡ ਦਾ ਨਿਰਮਾਣ ਕੀਤਾ ਜਾ ਰਿਹਾ ਹੈ ਜੋ ਜਲਦ ਹੀ ਪੂਰਾ ਹੋਣ ਵਾਲਾ ਹੈ। ਇਸ ਪ੍ਰੋਜੈਕਟ ਦਾ ਮੁੱਖ ਉਦੇਸ਼ ਸ਼ਹਿਰ ਵਿੱਚ ਟ੍ਰੈਫਿਕ ਜਾਮ ਨੂੰ ਘਟਾਉਣਾ ਹੈ। ਇਸ ਤਹਿਤ ਐਨਐਚ-152, ਐਨਐਚ-344, ਐਨਐਚ-444A ਅਤੇ ਐਨਐਚ-44 (ਦਿੱਲੀ-ਜਲੰਧਰ) ਨੂੰ ਆਪਸ ਵਿੱਚ ਜੋੜਿਆ ਜਾਵੇਗਾ, ਜਿਸ ਨਾਲ ਅੰਬਾਲਾ ਛਾਵਨੀ ਅਤੇ ਸ਼ਹਿਰ ਵਿੱਚ ਟ੍ਰੈਫਿਕ ਦੀ ਸਮੱਸਿਆ ਘਟੇਗੀ ਅਤੇ ਕਨੈਕਟਿਵਿਟੀ ਹੋਰ ਮਜ਼ਬੂਤ ਹੋਵੇਗੀ।