ਆੜਤੀਆਂ ਦਾ ਬਾਸਮਤੀ ਦੀ ਬਕਾਇਆ ਰਕਮ ਨਾ ਮਿਲਣ ਦੇ ਰੋਸ ਵਜੋਂ ਦਿੱਤਾ ਧਰਨਾ ਚੌਥੇ ਦਿਨ ਜਾਰੀ

ਆੜਤੀਆ ਐਸੋਸੀਏਸ਼ਨ ਕੋਟਕਪੁਰਾ ਦੇ ਲਗਭਗ 200 ਆੜਤੀਆਂ ਨੇ ਆਪਣੇ ਹੀ ਸਾਥੀ ਆੜਤੀਏ ਵਿਰੁੱਧ ਉਸ ਦੀ ਦੁਕਾਨ ਮੂਹਰੇ ਰੋਸ ਧਰਨਾ ਦਿੰਦਿਆਂ ਨਾਅਰੇਬਾਜ਼ੀ ਕੀਤੀ। ਉਹਨਾਂ ਦੋਸ਼ ਲਾਇਆ ਕਿ ਤੇਤਾ ਰਾਮ ਕਮਿਸ਼ਨ ਏਜੰਟਸ (ਟੀ.ਆਰ. ਐਗਰੋ) ਇੰਡਸਟਰੀਜ ਵਾਲਿਆਂ ਨੋ ਕੋਟਕਪੁਰਾ, ਫਰੀਦਕੋਟ, ਬਰੀਵਾਲਾ ਅਤੇ ਹੋਰ ਨੇੜਲੇ ਇਲਾਕਿਆਂ ਦੇ ਆੜਤੀਆਂ ਦਾ ਲਗਭਗ 55 ਕਰੋੜ ਰੁਪਿਆ ਰੋਕ ਰੱਖਿਆ ਹੈ। ਉਹਨਾਂ ਦੱਸਿਆ ਕਿ ਬਾਸਮਤੀ ਦੇ ਪੈਸੇ ਅਤੇ ਇੱਕ ਨੰਬਰ ਵਿੱਚ ਲਈ ਗਈ ਰਕਮ ਵਾਪਸ ਨਾ ਮਿਲਣ ਕਰਕੇ ਉਹ ਪਿਛਲੇ ਡੇਢ ਸਾਲ ਤੋਂ ਪ੍ਰੇਸ਼ਾਨ ਅਤੇ ਬੇਚੈਨ ਸਨ, ਜਿਸ ਕਰਕੇ ਉਹਨਾਂ ਨੂੰ ਇਸ ਫਰਮ ਮੂਹਰੇ ਧਰਨਾ ਲਾਉਣ ਲਈ ਮਜਬੂਰ ਹੋਣਾ ਪਿਆ। ਆਪਣੇ ਸੰਬੋਧਨ ਦੌਰਾਨ ਆੜਤੀ ਐਸੋਸੀਏਸ਼ਨ ਦੇ ਪ੍ਰਧਾਨ ਉਮੇਸ਼ ਗਰਗ, ਜਨਰਲ ਸਕੱਤਰ ਮੋਹਿੰਦਰਪਾਲ ਸਿੰਘ ਲੱਕੀ, ਸਾਬਕਾ ਪ੍ਰਧਾਨ ਕ੍ਰਿਸ਼ਨ ਗੋਇਲ ਅਤੇ ਬਰਜਿੰਦਰ ਕੁਮਾਰ ਬੰਟੀ ਗਰਗ ਪ੍ਰਧਾਨ ਫਰੀਦਕੋਟ ਸਮੇਤ ਵੱਖ-ਵੱਖ ਬੁਲਾਰਿਆਂ ਨੇ ਦੱਸਿਆ ਕਿ ਰੋਜਾਨਾ ਸਵੇਰੇ 11:00 ਵਜੇ ਤੋਂ ਬਾਅਦ ਦੁਪਹਿਰ 2:00 ਵਜੇ ਤੱਕ ਇਹ ਧਰਨਾ ਅਣਮਿੱਥੇ ਸਮੇਂ ਲਈ ਜਾਰੀ ਰਹੇਗਾ। ਜੇਕਰ ਫਿਰ ਵੀ ਸਾਡੀ ਰਕਮ ਵਾਪਸ ਨਾ ਮਿਲੀ ਤਾਂ ਅਸੀਂ ਸੰਘਰਸ਼ ਤੇਜ਼ ਕਰਨ ਲਈ ਮਜਬੂਰ ਹੋਵਾਂਗੇ। ਉਹਨਾ ਦੇਸ਼ ਲਾਇਆ ਕਿ ਫਰਮ ਕੋਲ ਜਾਇਦਾਦ ਅਤੇ ਸਰਮਾਏ ਦੀ ਕੋਈ ਕਮੀ ਨਹੀਂ, ਕਿਉਂਕਿ ਉਕਤ ਫਰਮ ਦੇ ਸਾਰੇ ਕੰਮ ਪਹਿਲਾਂ ਦੀ ਤਰ੍ਹਾਂ ਹੋ ਰਹੇ ਹਨ ਅਰਥਾਤ ਉਹਨਾ ਦਾ ਵਪਾਰ ਬਿਨਾ ਰੋਕ ਟੇਕ ਦੇ ਚੱਲ ਰਿਹਾ ਹੈ, ਜਦਕਿ ਬਕਾਇਆ ਰਕਮ ਦੀ ਉਡੀਕ ਕਰਨ ਵਾਲੇ ਆੜਤੀਏ ਖਰੀਦੇ ਮਾਲ ਦਾ ਭੁਗਤਾਨ ਕਰਨ ਲਈ ਆਪੋ ਆਪਣੀਆਂ ਜਾਇਦਾਦਾਂ ਵੇਚਣ ਜਾਂ ਕਰਜਾ ਚੁੱਕਣ ਲਈ ਮਜਬੂਰ ਹਨ। ਟੀ.ਆਰ. ਐਗਰੇ ਇੰਡਸਟਰੀਜ ਦੇ ਮਾਲਕ ਸ਼ਾਮ ਲਾਲ ਗੋਇਲ ਨੇ ਆਖਿਆ ਕਿ ਜੇਕਰ ਉਹਨਾਂ ਨੂੰ ਮੇਰੇ ਪ੍ਰਤੀ ਕੋਈ ਗਿਲਾ ਹੈ ਜਾਂ ਕਿਸੇ ਪ੍ਰਕਾਰ ਦਾ ਵਿਵਾਦ ਹੈ ਤਾਂ ਉਹ ਅਦਾਲਤ ਵਿੱਚ ਜਾ ਸਕਦੇ ਹਨ ਪਰ ਮੈਨੂੰ ਗੈਂਗਸਟਰਾਂ ਅਤੇ ਮਾੜੇ ਅਨਸਰਾਂ ਤੋਂ ਧਮਕੀਆਂ ਦਿਵਾਈਆਂ ਜਾ ਰਹੀਆਂ ਹਨ, ਜਿਸ ਦੀ ਮੈਂ ਪ੍ਰਵਾਹ ਨਹੀਂ ਕਰਦਾ। ਉਹਨਾਂ ਆਖਿਆ ਕਿ ਜੇਕਰ ਮੈਂ ਕਿਸੇ ਆੜਤੀਏ ਦਾ ਕਰਜਾ ਦੇਣਾ ਹੈ ਤਾਂ ਉਹ ਅਦਾਲਤ ’ਚ ਮੇਰੇ ਵਿਰੁੱਧ ਸ਼ਿਕਾਇਤ ਦਰਜ ਕਰਵਾ ਸਕਦੇ ਹਨ ਪਰ ਰੋਸ ਧਰਨੇ ਵਰਗਾ ਰਵੱਈਆ ਬਿਲਕੁਲ ਵੀ ਠੀਕ ਨਹੀਂ। ਇਸ ਮੌਕੇ ਤੇ ਨਿਰਮਲ ਬਾਂਸਲ, ਸੰਜੇ ਮਿੱਤਲ ਵਿਜੇ ਕਟਾਰੀਆ, ਜਸਕਰਨ ਮੱਕੜ ਰਮਨ ਬੰਸਲ, ਹਰਮਨ ਮੱਕੜ ਮਹਾਂਵੀਰ ਬਾਂਸਲ ਜੱਗੀ ਮੱਕੜ ਮਨਜੀਤ ਸਿੰਘ ,ਮਨੀਸ਼ ਕਟਾਰੀਆ ਉਮੇਸ਼ ਗਰਗ ਯੁਧਵੀਰ ਸਿੰਘ ਵਾਂਦਰ ਹਰੀਸ਼ ਮਿੱਤਲ ਘਣਸ਼ਾਮ ਮਿੱਤਲ ਨਵਦੀਪ ਢਿੱਲੋ ਮਨਦੀਪ ਵਡਿੰਗ ਸੁਖਦੇਵ ਸਿੰਘ ਬੋਬੀ ਬੰਸਲ ਰੂਬੀ ਅਰੋੜਾ ਮਿੰਕੂ ਰੋੜਾ ਮਨਜੀਤ ਸਿੰਘ ਆਦਿ ਹਾਜ਼ਰ ਸਨ।