ਚਿਲੀ ਨੂੰ 6-0 ਨਾਲ ਹਰਾ ਕੇ ਮਹਿਲਾ ਨੇਸ਼ਨਜ਼ ਕੱਪ ਦੇ ਫਾਈਨਲ ’ਚ ਪਹੁੰਚੀ ਭਾਰਤੀ ਟੀਮ

ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਸੈਮੀਫਾਈਨਲ ਵਿੱਚ ਚਿਲੀ ਨੂੰ 6-0 ਨਾਲ ਕਰਾਰੀ ਹਾਰ ਦੇ ਕੇ ਐਫ਼ਆਈਐਚ ਮਹਿਲਾ ਨੇਸ਼ਨਜ਼ ਕੱਪ ਦੇ ਫਾਈਨਲ ਵਿੱਚ ਜਗ?ਹਾ ਪੱਕੀ ਕਰ ਲਈ। ਇਹ ਟੂਰਨਾਮੈਂਟ ਵਿੱਚ ਭਾਰਤ ਦੀ ਲਗਾਤਾਰ ਚੌਥੀ ਜਿੱਤ ਹੈ। ਭਾਰਤ ਲਈ, ਨਵਨੀਤ ਕੌਰ (6ਵੇਂ ਅਤੇ 13ਵੇਂ ਮਿੰਟ) ਅਤੇ ਦੀਪਿਕਾ (14ਵੇਂ ਅਤੇ 18ਵੇਂ ਮਿੰਟ) ਨੇ ਦੋ-ਦੋ ਗੋਲ ਕੀਤੇ, ਜਦੋਂ ਕਿ ਨੇਹਾ (32ਵੇਂ ਮਿੰਟ) ਅਤੇ ਰੁਤੁਜਾ ਦਾਦਾਸੋ ਪਿਸਲ (39ਵੇਂ ਮਿੰਟ) ਨੇ ਇੱਕ-ਇੱਕ ਗੋਲ ਕੀਤਾ। ਭਾਰਤੀ ਟੀਮ ਨੇ ਸ਼ੁਰੂਆਤ ਤੋਂ ਹੀ ਗੇਂਦ ’ਤੇ ਕੰਟਰੋਲ ਬਣਾਈ ਰੱਖਿਆ; ਨਵਨੀਤ ਨੇ ਛੇਵੇਂ ਮਿੰਟ ਵਿੱਚ ਪੈਨਲਟੀ ਕਾਰਨਰ ਨੂੰ ਬਦਲ ਕੇ ਟੀਮ ਨੂੰ ਲੀਡ ਦਿਵਾਈ। ਫਿਰ ਕਪਤਾਨ ਸਲੀਮਾ ਟੇਟੇ ਦੁਆਰਾ ਸ਼ੁਰੂ ਕੀਤੇ ਗਏ ਇੱਕ ਸ਼ਾਨਦਾਰ ਮੂਵ ਤੋਂ ਬਾਅਦ ਉਸਨੇ ਆਪਣਾ ਦੂਜਾ ਗੋਲ ਕੀਤਾ। ਦੀਪਿਕਾ ਨੇ ਲਗਾਤਾਰ ਦੋ ਪੈਨਲਟੀ ਕਾਰਨਰ ਨੂੰ ਬਦਲ ਕੇ ਭਾਰਤ ਦੀ ਲੀਡ 4-0 ਤੱਕ ਵਧਾ ਦਿੱਤੀ। ਦੂਜੇ ਅੱਧ ਵਿੱਚ, ਨੇਹਾ ਅਤੇ ਰੁਤੁਜਾ ਨੇ ਵੀ ਗੋਲ ਕੀਤਾ, ਜਿਸ ਨਾਲ ਫਾਈਨਲ ਸਕੋਰ 6-0 ਹੋ ਗਿਆ। ਕੁੱਲ ਛੇ ਗੋਲਾਂ ਦੇ ਨਾਲ, ਦੀਪਿਕਾ ਟੂਰਨਾਮੈਂਟ ਦੀ ਸਭ ਤੋਂ ਵੱਧ ਸਕੋਰਰ ਬਣ ਗਈ ਹੈ। ਕਪਤਾਨ ਸਲੀਮਾ ਟੇਟੇ ਨੂੰ ਉਸਦੇ ਸ਼ਾਨਦਾਰ ਪ੍ਰਦਰਸ਼ਨ ਲਈ ‘ਪਲੇਅਰ ਆਫ ਦਿ ਮੈਚ’ ਚੁਣਿਆ ਗਿਆ। ਚਿਲੀ ਨੇ ਆਖਰੀ ਕੁਆਰਟਰ ਵਿੱਚ ਕੁਝ ਮੌਕੇ ਬਣਾਏ, ਪਰ ਗੋਲਕੀਪਰ ਸਵਿਤਾ ਨੇ ਕਲੀਨ ਸ਼ੀਟ ਬਣਾਈ ਰੱਖਣ ਲਈ ਸ਼ਾਨਦਾਰ ਬਚਾਅ ਕੀਤਾ। ਭਾਰਤ ਹੁਣ ਫਾਈਨਲ ਵਿੱਚ ਦੂਜੇ ਸੈਮੀਫਾਈਨਲ – ਅਮਰੀਕਾ ਅਤੇ ਨਿਊਜ਼ੀਲੈਂਡ ਵਿਚਕਾਰ – ਦੇ ਜੇਤੂ ਨਾਲ ਭਿੜੇਗਾ।